Christian Thirion

Christian Thirion, ki s' no d' pene, c' est Li Blawete, c' est on scrijheu e walon, et on dessineu po s' plaijhi.

(e 2016)

Ouve e walon

Il a cmincî pa-z eplaidî des ratournaedjes di fåves da Lafontinne dins les ptitès gazetes.

Diviè 2013, i cminça a scrire e walon so les rantoeles di soçnaedje walon-cåzantes, aprume Fesse-bok.

I scrît purade des fåves eplaideyes eto dins l' Rantoele-gazete, dispu 2015. Li coirnêye si lome «Les crakes del Blawete». Adon-pwis, eto des imådjes po rire avou des tecses e walon (dispu 2018).

Il adjinçna ene après-nonne walone a Bhô ey a Gouvi pol fiesse ås lingaedjes walons e 2015.

Il a-st amonté ene copinreye a Gouvi e 2017. Cisse-ciale a rcandjî d' cogne et divni on cåbaret walon a Limerlé e 2021.

Ses idêyes

Il esplica ses idêyes sol walon e ratacaedje d' ene Rantoele-gazete.

I fåreut k’ li walon ni dvénxhe nén on foclôre ki n’ soeye pus djåzé k’ å teyåte. C’ est on pô trisse di vey des cis ki djåzèt walon dvins ene pîce di teyåte et ki rdjåzèt francès cwand l’ pîce est foû.

Djåzer l’ walon li pus possibe ås efants. Et arester d’ dire ki c’ est grossir !

Sayî d’ leyî toumer kékès viyès manires k’ on leye sovint dvins l’ walon. Dji n’ voe nén bén on djonnea di 18 ans dire a s’ crapåde « dji vos voe voltî ». I fåt sayî di divni on pô pus di nosse tins. Metans, divins les emissions e walon, mete ene sacwè d’ pus djonne, puvite ki d’ mete tofer des cis ki dansèt come a 18e sieke (minme si dji respectêye ces djins la). Mins cwand les djonnes veyèt çoula, i corèt tertos evoye.

Et pocwè nén po les patrons ki egadjèt des djins, scrire so l’ anonce « li cnoxhance do walon sereut-st ene atote. » I l’ fijhèt bén avou l’ lussimbordjwès. Et çoula, c’ est co l’ pus åjheye sacwè k’ on pout fé.

Li pus målåjhey mins l’ pus consecant : fåreut rsôrti l’ decret do mayeur Boland ki voleut rmete li walon e scole.

Hårdêyes difoûtrinnes

• Si prezintaedje di l' eglijhe di Bhô (sol Tévé walon-cåzante)
• Mwaisse modêye di ses crakes pol Rantoele (so "Berdelaedjes")
• Si modêye del fåve do vî vî tins «Li bijhe et l' solea» pol Djåzant atlasse éndjolike des lingaedjes di France et d' avår la.
• Si waibe-blok
• Sacwants redjårbaedjes di tchansons francesses (so "Berdelaedjes")
• Li Wiccionaire si rsieve di sacwantès fråzes da Christian Thirion po-z enimådjî des mots k' i gn a.
• Vos trouvroz des racsegnes so les ouves da Christian Thirion, u les ouves zeles-minmes, so Wikisourd e walon.