Modern family

Li logo do rîlêye-fime e lingaedje d' oridjene.

Modiene famile[1] (e-n inglès Modern Family), c' est on rîlêye-fime amerikin di 11 rîlêyes.[2]

Istwere candjî

Li tchinne amerikinne ABC a yeu l' idêye di mete so pî ci fouyton tévé ci, e 2009.[3] Li produjhaedje do rîlêye-fime a stî staté après les 11 rîlêyes, e 2019.[4]

El Beldjike, Modern family a passé al televuzion dins les deus costés do payis. El Waloneye, elle a passé so RTL-TVI, adon k' e Flande, c' esteut aprume so Q2.[5][6] Asteure, el Flande, c' est sol varyisté flaminde del tchinne amerikinne Comedy Central.

Sudjet candjî

Dins l' fime, i gn a aprume troes forveyowès familes, poy cwate, ki sont aparintêyes, et i shonne k' ele dimornut so l' minme sitrêye.

Persounaedjes candjî

Prumî manaedje candjî

 
Ene pårteye des acteurs ey actresses.

Po cmincî, gn a Djaiy Pritchett (ingl. Jay), on vî ome. Il a deus grands efants: Mitchî (Mitchel) et Claire, k' il a yeu avou s' prumire feme Dedêye (Dede), k' il est dismaryî d' avou. Li Djaiy s' a rmaryî avou ene djonne comere colombyinne, Gloriya (Gloria), et il acléve li råpén d' citlale, Manî (Manny). Djaiy a stî patron d' ene kipagneye ki fwait des dresses, et esse foirt sitou d' s' awè basti ene veye avou ses mwins da lu. Il est todi wårdiveus, et on l' voe si rapinser, paski çou k' i s' passe åtoû d' lu candje ses totès fwaitès idêyes. Come il aveut sitî foû måjhon cwand ses deus efants da lu avént sitî ptits, et n' nén prinde sogne d' els aclever, adon asteure i s' forboute po bén aclever s' fiyåsse Manî, et poy l' efant k' il årè avou Gloriya, et ki s' lome Djôzef (ingl. Joseph Fulgencio ou Joe). Gloriya a stî moenneuse di tacsi, mins bråmint des omes el waitnut avou des beas ouys vêyanmint k' elle est foirt nôzêye, mins asteure elle est mere al måjhon. Manî est on efant ki tuze come on grand. Tofer, gn a Dedêye et l' ancyin ome da Gloriya, ki s' lome Zavî (Javier), ki vegnnut di tenawete cweri des mizeres al famile. Djaiy a des rujhes avec ses deus beas-fis, ki n' sont måy bén assez por li. Gloriya a eto des rujhes avou les mayons di s' fi. Li manaedje a eto ene lexhe, Stela, ki l' feme voet evî, eyet l' ome voltî, come s' elle åreut sitî s' feye.

Deujhinme manaedje candjî

Li deujhinme famile, les Dunphy, c' est Claire (li feye da Djaiy et Dedêye), avou s'-t ome Fil (Phil). Il ont troes efants: Haileye (Haley), Alecse (Alex/Alexandra), et Luk (Luke). Claire a stî a l' unif, poy elle a ratindou famile, et s' a rade maryî avou Fil, ki ses parints voeyént evi, tot sondjant k' il aveut bouxhî l' cårire di leu feye evoye. Po fini, Claire est mere al måjhon, et Fil boute come vindeu d' måjhons. Poy, Claire ripudrè l' kipagneye di s' pa Djaiy, cwand Djaiy pudrè s' ritraite. Haileye est foirt biesse, et n' sondjî k' a s' amuzer. Alecse est ene pitite syinceuse, ki ses parints n' savnut préjhî come i fåt. Luk inme bén s' amuzer avou s' pa; pa des côps il est foirt biesse, mins sovént i tire si plan meyeu k' les grandès djins. A on moumint dné, li fåve ri rpete, et Haileye ratinde famile a s' toû, adon ki s' mere Claire voet evi s' bea-fi Dilane (Dylan). Claire a tofer des rujhes avou s' bele-mere Gloriya, k' a l' minme ådje, a pô près, ki leye.

Troejhinme manaedje candjî

Li troejhinme famile, c' est Mitchî (li fi da Djaiy et Dedêye), avou s'-t ome Cam, k' ont afyî ene båshele do Vietnam, ki s' lome Lili (Lilly). Cam aveut grandi al cinse å Missouri, et wårder des manires di cinsî. Il est pere al måjhon. Mitchî est pårlî di s' mestî. Lili shonne eto foirt sûtêye po s'-t ådje, et tofer pus avanciveuse ki ses parints.

Cwatrinme manaedje candjî

Po fini, Haileye et Dilane ont ene djermale, Djôr (George) et Popeye (Poppy). Haileye n' a todi pont d' diplome, mins Dilane va a scole po divni sognant. Come li novele famile n' a pont d' cwårs, c' est Claire et Fil k' atoetnut les djonnès djins. Come Hailey ratindeut, il a falou k' leye et Dilan si maryénxhe rade moucheytiveuzmint, ene miete come ses parints lanawaire.

Sipoûles candjî

Tchaeke fime-boket a ses ptitès spoûles, avou èn ecsegnmint al difén. Po l' fime tot etir, li grande sipoûle, c' est l' timp ki passe: des djins aviyixhnut, des ôtès vegnnut å monde, pacôps des persounaedjes di deujhinme botnire mornut. Mins çou k' on voet dispoy li prumire disk' al dierene rîlêye, c' est ene djermêye di gamins ki crexhe, et tourner a grandès djins, fén a-z aclever zels minmes des efants. Les persounaedjes ont des laids costés, ey on lzè voet s' rabouni al dilongue. Åd contråve, les parints ont fwait des biestreyes dins leu djonnesse, et i volnut aschouwer leus efants, mins po fini les efants rotnut ezès smeles di leus parints.

Corwaitaedje candjî

 
Bele-mere, feyåsse et fiyåsse.

Li fime ni tént avou nouk sistinme politike, nén schayetmint todi. Les persounaedjes riprezintnut des tuzas k' i gn a, mins come i sont metous n' onk padvant l' ôte, nouk ni såreut dmorer èn aschatî. Les spoûles di tchaeke fime-boket pousnut les persounaedjes a dner droet ôtes, et s' si rapinser pacôps. Afeye, on persounaedje a ses droetès lenes, mins gn a des laidès afwaires ki s' pasnut, et l' persounaedje ni såreut pus schoûter ses prôpès droetès lenes, ey adon i lyi fåt candjî d' idêye.

LGBT candjî

Li spoûle di Modiene famile est assez avanciveuse po çou k' est des LGBT. Ene des copes do fime, Mitch et Cam, c' est deus omes, k' afeynut ey aclever ene båshele. E-n èn boket do fime, ki s' passe do timp ki l' mariaedje po tertos a stî clawé ezès lwès, li cope si mareye, et c' est ene des sipoûles d' ene rîlêye tot etire do fime. Des ôtes persounaedjes di deujhinme et troejhinme botnire ki sont gaiys et lesbyinnes aparexhnut al dilongue.

Adire d' ådje e mariaedje candjî

Li fime casse nete l' idêye ki, si ene djonne nozêye comere si marieye avou èn vî ome, c' est todi po les cwårs. Neni; vaici Gloriya raconte todi les ponants et les djondants douvént k' ele voet Djaiy voltî; minme si les cwårs di l' ome ni sont nén a taper pås finiesses, elle est ureuze e manaedje; d' alieur, elle a ddja metou des liårds so l' costé. On vout dire ki l' fime fwait les djins candjî d' idêye so ç' sudjet la. Gn a eto des persounaedjes di deujhinme botnire, ene cope, Fernando et Pepper, ki c' est co on djonne nozé latino ki s' marieye avou on vî ritche djwif amerikin, et nén po les çanses.

Raparintêye (rafwaite) famile candjî

Gn a bråmint des renondés manaedjes. L' idêye des disvoircîs (ou des vefs) ki s' rimareynut et rfé leu veye rivént tofer. Djaiy acleve Manî, c' est l' fi d' si feme, disk' a l' vey tot si voltî ki s' il åreut sitî la lu. Cam et Mitch aclevnut leu neveu, paski l' metchante mere est e prijhon, et ki l' pa est so tchamps so voyes ey afeye e prijhon eto.

Comeres ovrer candjî

Li tinme del feme ki n' overe nén est ratakêye d' ene ôte manire. Claire est pus diplomêye ki s'-t ome; s' ele n' overe nén po on timp, c' est po aclever les efants. Poy cwand ele ricmince a bouter, elle a des rujhes po s' fé respecter. Gloriya a stî tacsiteuse, on "mestî d' ome", mins après ele n' overe pus, po aclever ses efants. Purade ki d' taper l' hate so l' idêye del mare al måjhon, li fime el rafoircixh å stitchî Cam, on persounaedje k' est pere al måjhon.

Etrindjirs candjî

Les etrindjirs, foirt avant les latinos, sont bén corwaitîs. Po fini, gn a nolu did zels ki fouxhe nawe ou måhaitî.

Noers ey aziatikes candjî

E fime, gn a des blanks ki saynut d' awè des soçons noers. Les noers sont mostrés sovént come des djins des minmès nanxhes ki les blanks. Gn a pont d' gueto. On valet noer si rtrove e-n ene famile d' ascoye emon ene cope fwaite d' on djwif achkenaze et d' on latino, et l' efant, dedja assez grand cwand il avént, est on fén betch a môde di ses parints d' ascoye.

On persounaedje del prumire botnire, Lili, est aziatike. E fime, on mostere comint k' les amerikins di stok aziatike, ça ls anoye s' on les revoye todi ås raecenes.

Siplacas candjî

 
Filmaedje.

Modiene famile wåde bén sacwants splacas. Mitchî, on gaiy, a todi veyou li spôrt evi. Cam, si-t ome (ôte gaiy), creye et s' dislaminter tofer. Alecse, ene foirt sûteye båsheke, n' a pont d' ouys po les mousmints et les poudes. Les latinos ont des droles di manires. Les omes sont cåzu tchaeke côp prins påzès spôrts, foirt avant les valets a scole. Les valeurs et tuzance amerikinnes ni sont nén tofer rapinsêyes. Les latinos sont pus waeraxhes ki les amerikins.

Mins gn a des ôtes siplacas k' on speye. Cam est gaiy, mins il inme fotbalyî, disk' a tant k' i fouxhe prof di spôrt. Les meres al måjhon sont pacôps pus diplomêye ki les omes. Les cinsîs n' sont nén des payizans. Fil a des manires di djan-comere, mins sins esse gaiy.

 

Sourdants et pî-notes candjî

  1. Li plaeçaedje di l' addjectif « modiene », calké do francès, avou les regues do 20inme sieke, sereut padrî l’ no : « famile modiene ».
  2. E 2019, ons esteut produjhant l' onzinme rîlêye, k' on sait esse li tote dierinne.
  3. https://variety.com/2009/tv/news/abc-s-pilot-pickup-spree-1118003771/
  4. https://tvline.com/2019/02/05/modern-family-renewed-final-season-11-abc/
  5. https://web.archive.org/web/20131029204945/http://www.cinetelerevue.be/fr/modern-family-bientot-sur-rtl.html?cmp_id=7&news_id=12362
  6. https://www.flair.be/nl/chillax/series-films/6-weetjes-modern-family/