Gloria Pritchett

Gloria Pritchett – ou Gloriya – est on persounaedje do fime Modiene famile, djouwé pa Sofía Vergara.

Sofía Vergara, ki djowe Gloriya Pritchett.

Gloriya a skepyî e Colombeye, et s' no d' famile di båshele esteut Ramirez. Po cmincî, elle a stî marieye avou Zavî (Javier Delgado), ey awè eshonne on fi, Manî. Li côpe s' a dismaryî assez rade, et il a falou k' Gloriya aclevaxhe si fi tote seule. Elle a stî moenneuse di tacsi, et pormoenner Manî avou leye d' estant al faxhete et co pus grand.

Après, elle a tcheyou so Djaiy, on vî k' esteut lu eto disvoircî, et s' rimaryî zels deus. Gloriya a leyî s'-t ovraedje djus, veyanmint k' Djaiy est purade ritche, et dmorer mere al måjhon.

Etur tos les persounaedjes, Gloriya est ene bôle a pårt, come ele fwait totafwait sorlon li tuzance colombyinne, ou copurade ele maxhe les tuzances colombyinne et amerikinne, et ndè wårder çou ki lyi shonne di meyeu. Ses fråzes e-n inglès sont cossemêyes di mots castiyans. Ele touwe les biesses sins clignî des ouys. Ele s' araedje abeye, et s' mete a djiper tot si rade. Ele si vindje todi cwand les djins lyi fwaiynut do må.

Gloriya est mostrêye come estant li pus bele feme del sipoûle, et bråmint des omes cornut après leye, mins ele ni s' lait nén fé. Ele voet Djaiy voltî, et ça lyi plait k' Djaiy fouxhe fir d' awè ene si bele feme; ele lyi dit k' ele vout k' i l' metreut so on platea padvant ses soçons da lu.

Al dilongue des rîlêyes, Gloriya saye di s' fé accepter pa Claire, si feyåsse, ey i shonne ki Claire n' ès fwait todi nén a l' idêye. Gloriya est foirt amishtåve avou ses bea-bea-fis Fil et Cam.

Gloriya est grande inmeye avou l' ancyinne feme da Djaiy, ki c' est Dedêye, k' ele s' assaetche på tchiveas avou, mins ele voet evi s' sour Sonia eto.

Gloriya est ene mere-wastea po s' fi Manî. Pus tård elle årè avou Djaiy on fi, Djô (Fulgencio Joseph u Joe). Ele serè moens douce avou çtila.

Dins Modiene famile, Gloriya shonne esse li seule djin ki va a messe. Ele saye eto d' batijhî moucheytiveuzmint ses arire-pitits-fiyåsses Popey et Djôr. (Tolminme, ele n' inme nén l' tite d' arire-grand-maråsse, paski ça l' fwait viye, sapinse leye.)

Actoresse et persounaedje

L' actoresse Sofía Vergara dit k' elle a-st askepyî s' persounaedje å rprinde des ptitès spoûles ki s' ont vôrmint passé avou s' mere et s' matante. On moumint di s' veye, l' actoresse esteut mere tote seule, et lyi faleur bouter po-z aclever s' fi.

Li vraiy fi d' l' actoresse si lome Manolo; li fi do persounaedje Gloriya si lome Manî (Manuel).

Gloriya towe des biesses sins motî. Li pere di l' actoresse fourit mangon di s' mestî.

L' actoresse et l' persounaedje vegnnut del minme veye: Barankeye e l' Colombeye.