Philip Dunphy

Philip Dunphy – k' on lome djusse Fil – est on persounaedje do fime Modiene famile, djouwé pa Ty Burrell.

Ty Burrell, ki djowe Fil Dunphy.

Fil provént d' ene famile ewou les omes ni cåznut nén d' leus arokes, mins il est inmé pa ses parints. Cwand il a stî a l' université, i s' a metou e côpe avou Claire, mins po les parints d' citlale, i n' esteut k' ene sôre di barakî. Cwand Fil a fwait k' Claire ratindeut famile, i lzî a falou s' maryî zels deus, sins l' benediccion do pere da Claire, ki c' est Djaiy.

Fil a des rujhes a s' fé accepter pa s' bea-pere. Dispoy li prumî fime-boket, Fil si forboute po plaire a çtila.

Fil est l' pere da Hailey, Alecse et Luk. I dit tofer: "Dji so on popa tot souke tote låme." ("I am a cool dad. That's my thing.") I djowe bråmint avou s' fi Luk, et fé des biestreyes eshonne. I soçnêye bråmint avou Dilane, ki c' est l' galant (poy l' ome) di s' feye, mins ça n' ahåye nén s' feme Claire. Mins s' meyeu soçon, c' est s' bea-fré Mitchî, k' i rwaite li rîlêye-fime Li Guere des Stoeles avou. I soçnêye eto avou l' feme di s' bea-pere, ki c' est Gloriya.

Fil boute come vindeu d' måjhones a s' conte ou avou des ôtes. Al dilongue del rîlêye, il a sacwants inmis, ki sont des ôtes vindeu(se)s di måjhons, et s' fé todi rabaxhî pa zel(e)s.

E s' måjhon, il est purade wachoteu, et n' måy bouter come i fåt. I promete tofer k' i rferè on apas do schålî, mins i n' el rifwait k' el deujhinme rîlêye do fime. Il a deur a-z astoker ene dresse conte li meur; i n' fwait jamwais çou k' el feme lyi dmande di fé. Pé co, i schoûte mia ses soçons ki s' feme, çou ki fwait araedjî Claire.

I n' sait puni les efants cwand i fåt. C' est todi s' feme ki l' î pousse, et minme insi, i tént avou zels.

Di totes ses foices, Fil saye d' esse come les djonnès djins, mins ça toûne må sovént.

Fil est assaetchî påzès noerès femes, et minme des ôtès femes, mins il a des manires ki font ki sacwants djins pinsnut k' il est gaiy.

Cwand il esteut djonne popa, Fil a stî a on concours di cnoxhances al tévé, et wangnî des razoes.

Fil est eto so papî on minisse di culte po s' plaijhî, d' ene sôre di rlidjon k' on n' sait nén ç' ki c' est, seulmint po poleur oficyî a des mariaedjes. C' est lu ki frè l' deujhinme mariaedje di s' pere, et l' cia di Hailey avou Dilane.