Claire Dunphy

Claire Dunphy, c' est ene forveyowe djin (persounaedje), do fime Modiene famile, djouwé pa Julie Bowen.

Si paskeye dins l' fime

Claire, c' est l' feye da Djaiy et di s' prumire feme Dedêye. Elle est l' grande sour da Mitchî et l' dimeye sour da Djô Pritchett, mins eto l' souråsse da Manî. Cwand elle esteut båshele, c' est leye ki leu pere aveut ptchî. Dins les viyès videyos del copagneye Closets Closets Closets ("Dresses, dresses, dresses") do pere, on voet Claire båshele, k' est l' firté da Djaiy. Li pere djouwéve avou leye come il åreut djouwé avou on valet. E sacwants fime-bokets, Mitchî dit: "Claire, c' est l' valet k' nosse pere n' a måy avou."

Claire a stî a l' univiersité. Mins elle a rescontré Fil, on studiant discwårlé, ki les parints da Claire voeyént evî. Cwand Claire a stî ratindant efant, i lyi a falou s' maryî avou Fil, et mete å monde Haileye. A dater di ç' moumint la, Claire a leyî djus ses plans d' avni, po esse mere el måjhone.

Elle a metou å monde deus ôtes efants : Alecse et Luk. Si mwaisse pawou, c' esteut ki s' pus grande feye fwaiye el minme flotche ki leye (çou k' arivrè cwand minme).

Divins l' måjhon, c' est Claire ki tént l' pot droet, tins ki s'-t ome passe li tins a wangnî ene crosse, et djouwer avou ls efants. Avou les gaméns, elle est, come ele dit, li «flicresse» ("bad cop") del famile. Pa des côps, ele dit k' elle a cwate-z efants (nén troes), poy ki s'-t ome fwait come les efants, ey ele si sint l' divwer di l' «aclever», lu eto.

A on metou moumint, elle a candidé po esse eléjhowe conseyresse del comene, mins ça n' lyi a nén stî. On côp ki s' pere a prins s' pinsion, c' est leye k' a rpris l' copagneye di dresses, et l' raploure eshonne avou ene ôte kipagneye. Å buro, elle vout esse tot souke tote låme avou les eployîs, adon k' ele sait ki s' pere Djaiy aveut moenné l' måjhon avou ene mwin d' fier. Mins les eployîs ont do må a l' respecter, veyanmint k' el riwaitnut djusse come li «ptite gamene do patron».

Claire a todi avou des rujhes avou s' prôpe mere Dedêye. Mins elle a eto co des bisbrouyes avou s' bele-mere Gloriya, k' a l' minme ådje ki leye, a pô près. Al dilongue des rîlêyes, Gloriya saye di s' fé accepter pa Claire, ey i shonne ki Claire n' ès fwait nén a ciste idêye. Elle a eto deur avou s' freråsse Manî, adon k' i gn a ene djermêye d' adire etur zels deus.

Avou s'-t ome Fil, ele fwait cwand minme ene côpe bén a båre. Ele n' est nén målureuse dins s' manaedje, mins ons etind k' ele voet Fil voltî. Ons aprind k' elle aveut fwait bråmint des biestreyes cwand elle esteut djonne, paski gn a des viyès fotos et des djins ki racontnut ça padvant ses efants. Ele sait k' ele n' a nén stî droete dins ses botes, mins ele vôreut k' ses efants si frént d' leye l' idêye k' elle a stî ene pitite sinte.

On côp, les efants ont tcheyou al axhlêye so Claire et Fil k' estént fjhant l' amour, et rexhe foû tot ewaerés.

Dins s' libe tins, Claire va tote seule di djin so l' sitrande, ou tirer å fizik po s' plaijhi, ou boere avou des gais. Elle est eto foirt assaetcheye pa les fiesses di l' Alowine. Et l' fiesti, tos ls ans, et aler fé sogne ås efants des vijhéns.

Claire et Fil n' avént nén yeu l' tins d' esse evoye po l' voyaedje di noices. Adon il ont planifyî d' el fé vint ans pus tård, et si aler e Toscaneye. Åré ki s' feye Haileye s' a discovrou come ratindant famile, ey adon Claire n' a pus stî d' atake po l' voyaedje. Ele s' a fwait grand-mere del djermale Djôr et Popeye.

Claire a todi stî sconte li rlåcion di s' feye Haileye avou Dilane, et vey Dilane evi dispoy li prumî fime-boket, et disk' al sikepiance del djermale.

Ele si sint modiene. Portant elle a sovént espaitchî s' feye Alecse, cwand cisse-lale aveut des sacwès a studyîs. Po s' fé inmer påzès gaméns, pa des côps on l' voet lzès prinde dins l' oto, eyey lzès poûssî a magnî des soucreyes, disk' a tant k' i rnådnuxhe. Sacwants côps, elle et Fil avegnnut trop tård al ceremoneye di rindaedje di diplome di leus efants; pa des côps, i roveynut les efants dins l' oto ou so ene parkigne ou co dins l' måjhon. Claire a l' mwaijhe abitude di sorire u d' rire cwand ele anonce des mwaijhès noveles, foiravant cwand c' est moirt d' ene sakî.

I shonne ki l' meyeu soçon da Claire fouxhe Mitchî, ki c' est s' fré. Come cwand il estént ptits, il inmnut s' muchyî dzo l' tåve, et si s' aschatî, po sawè cåzer inte di zels, lon erî des djins.