Douccala
Li plin des Douccala [1] ( arabe «دكالة», Fr. «les Doukkala»), c’ est on plin metou dirî El Djadida, tot-z alant so Marakech.
Etimolodjeye
candjîLi mot vénreut di l' amazir «ⴰⴷⴽⴽⵯⴰⵏ» (adekkan) ki vout dire «scanfår» u banc d' pire k' i gn aveut dvant les måjhons po fé ratinde les priyîs.[2][3]
Li sinse mosterreut come on platrê divant d' avni ås montinnes do Grand Atlasse.
Mwaissès racsegnes
candjîLes gros borks î sont Sidi Smayil (Sidi Smayin), Sidi Bennour, Had Ouled Frej et Xhamiss Zemamra.
C’ est ene des prumirès contrêyes agricoles do Marok. Mins gn a waire åk a vey po les tourisses.
Li plin des Douccala est retourêye di l’ Oceyan Atlantike (å Coûtchant), del Chawouya (a Bijhe), do plin des Rahamna (å Levant) et do plin d’ l’ Aabda (a Nonne).
Administrativmint, les Douccala sont mitan dins l' province d' El Djadida, mitan dins l' novele province di Sidi Bennour.
Istwere
candjîDiviè 750, Moulai Idriss vout ki les berberes Douccala dimorént dispu Anfa (Cazablanca) disk’ a Walidiya, et ki l’ sitindêye di leus teres aléve disk’ a Taroudinne et l’ plin do Massa.[4]
Les Douccala si revintît disconte des rwès Almohådes e 12inme sieke. Diviè 1160, li zultan Aabdelmoumen î fjha ebaguer d’ foices sacwants tribus arabes (inte di zeles les Beni Hilal) et retchessî les Douccala foû del ritche plinne, ezès viyaedjes et ezès tienes do Grand Atlasse et des Djebletes.[5]
Dispu li cmince do 16inme sieke, li no « Douccala » n’ est pus eployî po ene tribu, mins po ene contrêye metowe inte l’ Aiwe do Bontins et l’ Aiwe do Tensifete. Cwand les Portuguès ocupèt Mazagan (El Djadida), li province des Douccala paye ses taeyes å Rwè do Portugal. Si teritwere aléve disk’ a 3 km pus lon ki Djemaa Mtal, a on viyaedje ki s’ lome co «Guerando».[6] C’ est dandjreus do tins des Portuguès ki les tazotas ont prins leu no. Il ont eto cåvlé bråmint des pousses k’ on lome vo asteure « bir dial Bourtouqîss » (pousse des Portuguès).[7]
Do tins del mambornance francesse, gn aveut dins les Douccala 372.269 muzulmans, 2680 Uropeyins et 3933 Djwifs.[8]
Djeyografeye
candjî
Li plin des Douccala pout esse pårti e troes bindes di tere, a cmincî do rivaedje del mer :
- Li wouldja (li rivaedje lu-minme), bén raiwé del plouve, la k’ i gn a bråmint des cotlîs. Come industreye, gn a la li nouzome pôrt di Djorf Lasfar.
- Li Sahel on pirixheus payis, avou kékes bwès et sacwants tropeas d’ bedots et d’ gades.
- Li ritche plinne leye-minme, avou des bounès dieleusès teres (« tirse ») et do bon schayisse (« hamri »). C’ esteut des teres a frumint. Dispu k’ elle ont stî raiweyes pal voye d’ ene astantche (diviè 1980), on-z î ahive eto del betråle å souke et des fôraedjes (mayisse, trefe d’ Edjipe, luzere). Padecô, les anêyes di grossès plouves, ene pårteye del plinne, inte Sidi Bennour et Arbaa Ouled Aamrinne est dizo aiwe. C’ est l’ basse do Warar.
- Li seule cresse k’ on pout vey sol contrêye, li « Djebel Xhedar » (vete montinne) fwait limotche avou l’ plin des Rahamna.
Economeye
candjîAgricoûteure
candjî
Li mwaisse ovrance economike, c’ est l’ agricoûteure et l’ aclevaedje di bovrins, avou l’ grand martchî di Sidi Bennour. C’ est la k’ gn a eto ene des pus grossès soucreyes do payis. Li laecea est vindou a deus laeçreyes d’ El Djadida.
Dinltins, les rodjès cawoûtes estént ene glwere des Douccala. On dit e-n arabe marokin :
- Si les cawoûtes serént do froumadje, les Douccala serént li Holande.
Industreyes
candjîCome industreyes, n a l’ pôrt di Djorf Lasfar, ki djowe avou les fosfates di Khouribga, et produre do corant a pårti do tcherbon k’ arive pa les bateas. Sol boird des Douccala, gn a eto les menes di fosfates di Youssoufia, mins la, li minrai va so Asfi. N a k’ on zonigne dins l’ payis : a El Djadida.
Siervices
candjî
Les siervices ni sont waire diswalpés, apus ki les cis po l’ agricoûteure (martchand d’ machines di cinse, årtisses veterinaires, evnd). Tolminme, Sidi Bennour a divnou pitchote a midjote ene pitite veye avou des scoles privêyes, des bankes et totès sôres di ptits handeles.
Dins les anêyes 1930, des Bedjes î avént basti ene lene di tchmin d' fier inte El Djadida et Sidi Bennour, avou ene gåre a Arbaa Mogress. Mins elle a clôs botike diviè 1935, ca gn aveut nén do traeyin assez.
Djins
candjî-
Kimere avou tatouwaedje di ricnoxhance (do trevén francès) -
båsheles ås blonds tchveas -
Kimere efornant l' pwin, l' ôte poirtant on påpåd -
Eforneuse ey efornoûle
Avey
candjî
Les Douccala ni sont nén foirt ricwerous des tourisses. Portant, gn a des sacwè a vey foû d' El Djadida ey Azzemmour.
Sourdants et pî-notes
candjî
- ↑ Shuvant les rîles di riscrijhaedje do son K e rfondou walon.
- ↑ Tuzaedje d' ene djin cåzant amazir et dmorant e Doukkala. Li payis, asteure, djåze l' arabe marokin, mins gn a co bråmint des rmanances di l' amazir dins l' motlî et dins les nos d' plaece.
- ↑ Ce sourdant amazir la, c' est on mot omrin. Li dischindant arabe marokin, c' est on femrin singulî. L' uzaedje e francès, c' est d' endè fé on pluriyal.
- ↑ Guide bleu Hachette du Maroc, 7inme ed., 1950, p. 178.
- ↑ Guide bleu Hachette du Maroc, ed., 1978, p. 302.
- ↑ Guide bleu 1978, come cial å dzeu.
- ↑ Lucyin Mahin, kinoxhances da sinne so les Douccala.
- ↑ Guide bleu, 1950, come cial å dzeu.