Cawete -isse 1

Pol discramiaedje des årtikes avou l' mot « Cawete -isse », loukîz cial.

Li cawete -isse 1, c' est ene cawete, nén foirt vicante mins pår walone, ki si stitche après on no u après on viebe, et dene on no u èn addjectif.

Les sacwès lomêyes avou on no e "-isse" sont-st ene miete rabaxheyes. Po les addjectifs, c' est purade po djåzer di des dfåts.

Portant, sacwants mots n' ont nén (u ont pierdou) ci laid costé la (treyisse).

Li cawete -isse provént del cawete latene -iciu. Ele respond a ene cawete francesse -is, la k' on n' prononce nén li "S", di des mots comme "fouillis", "clapotis".

Li cawete est omonime del cawete -isse 2 (socialisse, comunisse).

Egzimpes d' addjectifs avou l' cawete -isse

acawêye a on viebe

• taenisse, hodisse : refoircixhadje des mots sinomimes hodant, taenant (cawete -ant) et hodåve (cawete -åve).
• covisse
• endalisse

acawêye a on no

• djivisse

Egzimpes di nos avou l' cawete -isse

• flaxhisse, sitokisse,
• bôjhisse, brôwisse
• candjisse
• tchinisse
• treyisse
• raxhisse
• taexhnisse

Vicansté del cawete -isse

Li cawete -isse n' a nén siervou ås noûmots foirdjîs pås scrijheus lidjwès å cmince do 20inme sieke.

On tuze k' on mot come "endalisse" pôreut aveur stî foirdjî pa A. Laloux. Kécfeye bén ossu "djivisse".

Gn a waire yeu d' noûmots askepyîs påzès rfondeus avou l' cawete -isse, dandjreus paski c' est ene cawete ki dene on sintumint sol sacwè. Tolminme, on pout rilever : candjisse

Vîs scrijhaedjes del cawete -isse

Dins l' sicrîta, ci n' esteut nén åjhey di ricnoxhe li cawete -isse, ca les mots estént sovint scrîts is ki pout esse eto li cawete -i (Stockis, Stoquis). Rilevans kel cawete -î, dins le scrîta, est pus sovint ortografieye -y (Stoky)

Dins les scrijhaedjes di dvant Feller, li cawete est ortografieye -iss dins l' Motî da Forir.

E sistinme Feller, li cawete -isse si scrît avou ene coron-faflote : -is´ po les addjectifs et les mots omrins, et -isse po les addjectifs et mots femrins.

E rfondou walon, shûte å disfaflotaedje, li coron-faflote n' est pus eployeye : on scrît li cawete omrinne et femrinne -isse.

Parints foirdjîs sol cawete -isse

Li cawete -isse pout aveur des parints :

• avou l' cawete -reye : tchinisreye.

Hårdêyes difoûtrinnes

• Sacwants sustantifs avou l' cawete -isse 1 (dedja studyîs sol Wiccionaire)
• Sacwants addjectifs avou l' cawete -isse 1 (dedja studyîs sol Wiccionaire)