Crås sonk

Li crås sonk, c’ est ene atuze di docteur come cwè, cwand on va fé ene prijhe di sonk, et k’ on a do colesterol dins l’ sonk k’ est trop hôt, c’ est k’ on magne trop crås.

Et cwand on magne trop crås (dj’ ô bén : des amagnîs avou del crås seurs bôrés), on a bråmint dpus d’ tchances d’ atraper des maladeyes di cour et des ecdûts.

Les docteurs vos scrijhèt adon ene drouke po fé baxhî l’ colesterol dins l’ sonk, del famile des statenes.

Corwaitaedje di l’ atuze do crås sonk

Li colesterol, ci n’ est nén les cråxhes di l’ amagnî ki passèt dins l’ sonk. Cesses-la, c’ est les cråssès proteyenes. C’ est zeles, k’ on pôreut dire ki rindèt l’ sonk crås.

Ces crås blandoûs la sont foirt grosses ; ele so polèt astoker dins les ptitès voennes, et stoper l’ arivêye do sonk dins l’ texhou k’ est raiwé par zeles. Et c’ est l’ infractusse.

Asteure, est çki l’ colesterol dins l’ sonk mostere bén li sôre d’ amagnî k’ on magne. Et fé baxhî ci-la, est çki c’ est fé baxhî l’ risse d’ atraper des racros å cour ou dins les voennes (metans èn accidint ås ecdûts do cervea) ^{(a-z aveuri)}

Des studias k’-i-gn-a avént ddja mostré k’ on hôt colesterol dins l’ sonk ni vneut seulmint k’ po 10 % di l’ amagnî. Po 90 åcint, c’ est on caractere di famile.

I shonnreut don ki li mzuraedje do colesterol dins l’ sonk po-z avirer les risses d’ awè des maladeyes ni soeye nén foirt sûti. Ci pôreut esse ene atuze edvintêye pa les martchands d’ droukes di farmaceye po vinde les prodûts ki fwaiynut baxhî l’ colesterol.

Efets dléreces des statenes 

Li colesterol, c’ est ene molecule biyolodjike ki rshonne a bråmint des ôtes prodûts do coir (metans : li cortizone, ou l’ vitamene K). Les prodûts k’ abaxhèt l’ colesterol espaitchèt eto li produjhaedje di sacwants ôtes prodûts come li cowinzime K3, on controcsidant. Ces prodûts la (les controcsidants) espaitchèt l’ aviyixhmint des celules. Leu manke va dner pus åjheymint des roumatisses.

Ricete po n' nén atraper l’ crås sonk

I gn a k’ a :

• magnî ostant d’ cråxhes nén bôrêyes (avou des omegas 3 ki d’ cråxhes bôrêyes.
  • amagnîs ås cråxhes nén bôrêyes : ôles, setchs fruts, pexhon, poytreye.0
  • amagnîs ås cråxhes bôrêyes : rodjès tchås (boû, pourcea, bedot), cråxhreyes (såcissons, djambon, tripes…), boure, froumadje, frisse crinme.
• fé d’ l’ egzercice (roter 20 munutes par djoû) po broûler les cråxhes.