Blanke rezete

Li blanke rezete, c' est ene fleur des tchamps såvlonixheus des payis del Mîtrinne Mer.

fleur

Sincieus no d' l' indje : Reseda alba

Spårdaedje

Ele si rescontere so les trîxhes et les djouxhires nén trop lon del Mîtrinne Mer.

Ele vént eto so les teres å boird di l' Oceyan Atlantike, disk' å Payis d' Wale (veyanmint k' elle a on no e walès a pårt) ey pår e l' Norvedje. End a eto so les såvlons toprès del Mer do Nôr e l' Flande ey e l' Neyerlande.. Et disk' ås coisses del Mer Baltike.

Discrijhaedje

Ele fwait 60 a 80 cintimete hôte.

Foyes ås grands dints, cénk a cwénze.

Les blankès fleurs sont-st arindjêyes a môde di troke simpe, so ene grande longueur do bodje. Did la si no e l' arabe marokin «cawe-di-bedot».

Les ptitès fleurs ont cénk florifoyes et cénk petales, tchaeke di zels discôpés avou troes stitchons å coron.

Les grinnes aparexhnut a fwait ådzo do bodje. C' est des boessetes cåzu rectingulreces d' a pô près 1,4 cintimete log.

• 
  plante etire
• 
  foye
• 
  fleur
• 
  grinnes (ådzo do bodje)
• 
  sol boird d' ene voye

Crexhaedje

e moes d' fevrî, so ene djouxhire (Douccala, Marok)

E Marok, ezès Douccala, ele vént a pårti des prumirès plouves do waeyén-tins (moes d' octôbe et nôvimbe). Ele florixh do moes d' djanvî å moes d' måss. C' est ene des pus edurantès fleurs a ç' moumint la. C' est l' mwaisse plante so les djouxhires cwand i fwait setch e moes d' djanvî.

E Midi del France, ele pout dmorer vicante d' ene anêye so l' ôte. Elle florit do moes d' avri å moes d' setimbe.

Uzaedje

C' est ene plante ki les bedots et les vatches paxhèt voltî.