Auguste Vierset
Auguste Vierset a skepyî li 12 di decimbe 1864 a Nameur ey a morou li 4 d' octobe 1960 a Knoke (ancyin ptit ban di Knokke-Heist)[1].
Ci fourit on scrijheu e walon.
Di s' mestî il esteut professeur d' escole mweyene a Wåve et Sint-Houbert, pu gaztî et mwaisse aidant do mayeur di Lidje.
Ouve pol walon
candjîE walon, i cmince tot djonne a scrire des powinmes, rashonnés dins "Poésies wallonnes" (1936) et "Tot schoyant l' pronnî" (1941). Tos ses arimés fourît rmetous eshonne dins "Mes djåbes" (1950).
Adonpwis, vo l' la ki s' assaye a èn ôte djinre, li paskeye: "Les paskeyes da Bietrumé Picård" (1938).
Il a scrît eto des pîces di teyåte : å cmince tins k' il esteut ki dmoréve a Sint-Houbert, des sinnetes avou l' accint do Bork, k' i fjha djouwer laddé minme :
- "Parache et Mimile" (1886)
- "Ene dimande e mariaedje" (1887), ene ouve motoit scrîte avou l' coplaedje da Paul Marchot, kel mete eto dins s' bibiografeye.
I ratake, ci côp ci, avou l' accint d' Nameur : "Li côp d' mwin da Tchantchès" (1891); "Li feye Matî" (1898), "Fleur di meskene" (1936), "Li miråke" (1937), "Li Noyé da Polite" (1941).
Il a eto ratourné e walon des pîces do scrijheu d' teyåte flamind Auguste Hendricke: "Prima Dona" et "Pierot vike co"; i rashia do francès "Amon les vîs", da M. Colruyt.
Li Gusse Vierset a bouté, avou, come ricwereu sol walon, et onk des prumîs a-z aprinde ås scrijheus namurwès comint discôper ene fråze e walon dins "Essai d'orthographe wallonne" (1885).
E 1887, il eplaide "Germain-Walon", la k' i djåze des rapoirts inte les lingaedjes tîxhons eyet l' walon.
I divna eto on corwaiteu des scrijheus d' belès letes e walon avou "Poètes Namurois" (1888).
Corwaitaedje di si ouve e walon
candjîDroldimint, Auguste Vierset n' est nén rprins dins l' grosse antolodjeye da Piron, motoit pask' il eploye cobén des mots et des ratourneures foû do walon d' Nameur, et aveur li dår di scrire des cråmignons, ene compôzucion pår lidjwesse.
Portant, on dit purade do bén d' lu dins èn årtike des prumîs Cayés walons. «Di tos les scrijheus provnant di Nameur minme, Gusse Vierset est seur li pus cnoxhou»[2]
Si ouve e francès
candjîIl a scrît eto e francès des contes-rindous d' voyaedjes, des ratournaedjes di l' inglès, des studias so des scrijheus bedjes, so l' istwere, des arimés, des romans et des pîces di teyåte.
Difoûtrinnès hårdêyes
candjî- Pådje di ses scrijhaedjes (so l' Aberteke)
Li Wiccionaire si rsieve di sacwantès fråzes da Auguste Vierset po-z enimådjî des mots k' i gn a.
Vos trouvroz des racsegnes so les ouves da Auguste Vierset, u les ouves zeles-minmes, so Wikisourd e walon.
Sourdants
candjî- ↑ Biyografeye da Auguste Vierset, sol waibe di L’Institut Destrée, Jean-François Potelle
- ↑ Siné J.M.C. Cayé Walon l° 13, djanvî 1938, p. 192.