Wikisourd walon-cåzant

Li Wikisourd walon-cåzant, c' est on pordjet Wikimedia askepyî pa deus Wikipedyisses, Julien Casters eyet Pablo Saratxaga, e 2018.

Istwere do pordjet

Di ç' tins la (e 2018), li pordjet n' esteut nén co indepindant. Si esteut i edjîstré sol waibe «International Wikisource».

Li 4 di decimbe 2020, li dmande d' on dominne po ç' pordjet la a stî acceptêye. Ça fwait: li Wikisourd walon-cåzant ava ene adresse da lu tot seu : «wa.wikisource.org», e l' plaece d' esse sol waibe «International Wikisource» come do trevén di ses deus prumirès anêyes.

Li 16 di decimbe 2020, li Wikisourd walon-cåzant a stî håyné sol Daegntoele.

A pårti di 2021, les tecses nén eplaidîs so papî ou sol Daegntoele ont stî metous e depot. Dj' ô bén ki les uzeus ordinaires ni les sårént rcandjî.

On rlomaedje del waibe avou ene ortografeye ki shuvreut spepieuzmint li rîle do scrijhaedje do son S (Wikissourd) a stî atåvlêye e 2022, mins nén ritnowe.

Contnou

Sôre di tecses

• Arimés
• Fåves do vî vî tins
• Romans et ptits romans
• ôtes pititès prôzes
• Pîces di teyåte
• Prôze nén racontrece
• crakes

Les motlîs walon-francès sont puvite metous sol Wikisourd francès-cåzant.

Nombe

Å moes d' decimbe 2020, gn aveut ddja 400 ouves so ç' waibe ci. Eviè l' fén do moes d' djun 2023, li mwaisse pådje mostere k' i gn åreut « 700 ouves e walon ».

Trepådjnaedje

Les årtikes sont trepådjnés e diferinnès categoreyes :

• sorlon l' sôre di scrijhaedje : powezeye, prôze racontrece u nén racontrece, Bindes d' imådjes.
• sorlon l' sôre d' ortografeye : do 17inme sieke, do 18inme sieke, do 19inme sieke, sistinme Feller (et ses dzo-categoreyes), rifondou walon (timprou ou d' asteure), rifondants walons (di sacwants sôres).
• sorlon l' dominne : gueres, amour, crakes, cinse et cinsîs, rilidjon, djeyografeye, istwere…
• sorlon les comenes del Walonreye k' on è cåze didins.