Prumire guere des scoles (Beldjike)

Pol discramiaedje des årtikes avou l' mot « Guere des scoles », loukîz cial.

Li prumire guere des scoles, e l' Beldjike, fourit ene margaye politike (sins moirts) inte disfindeus del sicole layike et shuveus des idêyes catolikes di l' acsegnmint. Ele dura di 1879 a 1884.

Caricateure d' ene gazete di 1878

Mwaissès dnêyes

C’ est les liberås ki sont å govienmint del Beldjike. I fjhèt passer des rfômes ene après l’ ôte po ki l’ societé ni soeye pus si alaxheye a l’ eståvlixhmint catolike. Come di djusse, les curés sont conte.

I s’ margayèt so toplin des sudjets come les novelès scoles, li programe a-z acsegnî, li manire di tchoezi les mwaisses di scole et professeurs, li controle des lives di scole.

Dins sacwants viyaedjes, les catolikes fijhèt des novelès scoles. Metans, li ptite tchapele di Smu, c’ esteut ene « sicole å curé »1

Spepieus disrôlmint

E 1878, les liberås, rashonnés pa Frère-Orban dizo l’ rapoûlant tinme do « sconte-calotinisse » wangnèt les vôtaedjes (madjorité absolowe). Pierre Van Humbeek (on rlomé sconte-catolike) divént minisse di l’ instruccion.

Li 21 di djanvî 1879, li govienmint fwait rexhe ene lwè ki dit ki tchaeke viyaedje doet aveur ene sicole primaire layike ou neute (adon, nén catolike, come sorlon l’ adjinçna del lwè di 1842). L’ acsegnmint del rilidjon n’ est pus dins les programes.

Li prumire guere des scoles finixha cwand l' deujhinme govienmint rashonnés på Walthère Frère-Orban fourit rcandjî på crustins ki vont dmoré å govienmint disk' al prumire guere daegnrece, e 1914.

Ci fourit l’ kiminçmint d' ene guere des scoles ki deure co å djoû d’ ouy. Ele kinoxha on fel ridjiblaedje avou l' deujhinme guere des scoles (1950 a 1959).

Foû del Beldjike

Li Neyerlande aveut ossu yeu ene guere des scoles etur liberås eyet crustins.

Referinces eyet sourdants

Alére

(fr) Jean-Claude Lebrun, La guerre scolaire de 1879-1882 à Smuid et à Libin, Aux Sources de la Lesse, 2011, pp 59-88.