Nicolas Pietkin a skepyî e 1849 ey a morou e 1921. C' esteut on scrijheu et on studieu do walon. C' est lu k' a-st enondé li disfindaedje do walon (et do francès) el Walonreye Prûssyinne, siconte do Kulturkampf.

Nicolas Pietkin
si tiesse so l' monumint al lovresse a Zôrbrôte

A moussî a l' SLLW e 1902.

Di s' mestî, il esteut curé a Zôrbrôte, la k' il dmoré disk' a s' moirt.

C' esteut l' mononke et li scoleu da Henri Bragard.

Vicåreye et scrijhaedjes candjî

E 1882, il amonte, avou Hubert Scius, l' Årmonak walon del samwinne.

E 1898, il enonde les Måmdiyins a askepyî li Club Walon. Si no d' pene å Club, c' esteut Fré Antoenne (Fré Antône), mins i sinéve å pus sovint ses scrîts "Club Walon" u n' nén siner do tot, di cåze del hagnûlisté do govienmint prûssyin siconte del tuzance walone.

Insi, i va scrire des viyès tchansons foclorikes bråmint e walon ("Ronde del Sint-Djhan", "Li ptite mazete"). Mågré k' i n' mete nén s' no, c' est bråmint li k' a adjinçné in live di tchansons siné Olivier Lebierre «Li lire måmdiyinne»", eplaideyes e 1901. Eto des tchansons ene miete politikes. Li pus cnoxhowe est kécfeye : "C' est des canayes, fré Hinri". C' est eto lu l' oteur avou Guillaume Boket di "Todi walon", l' îme del Walonreye prûssyinne.

Da sinne eto, des bokets eplaidîs plik plok, des ratournaedjes e walon, des arimés ("Onk n' est nén l' ôte"), des des arimés rilidjeus ("Céncweme"), des arimés lirikes "Li dierin tchaplet".

Pietkin a ossu scrît des fåves e prôze ("Li leu et li rnåd", "les rivnants marôdeus").

Aveut-st apontyî on sistinme d' ortografeye do walon måmdiyin (Système d' orthographe pour le wallon malmédien (1899).

E 1904, Pietkin sicrît on live e francès : La germanisation de la Walonnie prussienne. Avou ç' live la, on pout dire k' il a fwait del sociolinwince divant l' lete.

Ricnoxhance candjî

 
Plake del Bibliyoteke Nicolas Pietkin a Måmdey
 
Plake di l' rowe a s' no a Zôrbrôte

On lyi a fwait on monumint a Zôrbrôte, e 1926. Mins ci-cial fourit avaedjî e 1940 pås Nazis, pu rbasti e 1957.

Dispu 2000, li bibioteke do Club walon d' Måmdey poite si no. Gn a eto ene rowe a s' no a Zôrbrôte et a Lidje.

Nicolas Pietkin eyet l' politike prûssyinne "Kulturkampf" candjî

Cwand a yeu stî lomé priyesse e 1875, Cola Pietkin va bouter foû payis, po s' houwer erî del politike oficire. Il ala ezès Bas-Payis.

I n' rivénrè k' e 1977. Come i dnéve li comunion e catchete, il a yeu des rujhes avou les otorités.

Il a stî lomé curé a Zôrbrôte e 1881 mins ricnoxhou fok e 1889.

Nicolas Pietkin n' esteut nén on rezistant direk ås Prûssyins. Il aveut minme fwait ene sitrofe di rawete po-z ecinsî l' Kaizer dins "Walon todi". Mågré çoula, i fourit aresté 1914 et macsådé. I esta-st evoyî å camp d' prijhnî d' Elzenbôre. Laddé, gn aveut des prijhnîs rûsses; il a aprins li rûsse po djåzer avou zels.

A Zôrbrôte, i djheut messe e walon, e francès u en almand; i fjheut catruceme e walon, et dnéve des scoles di francès ås grandès djins, foû-z eures.