Léopold Godenne

imprimeu et scrijheu e walon
(Redjiblé di Yopôl Godenne)
Léopold Godenne
I gn a co pont d' imådje dizo licince libe so les Cmons. Si vos nd avoz ene po nozôtes, eberwetez-l' vaici, et merci co traze côps.
Skepiaedje19 di måss 1850, Malines
Moirt20 d' awousse 1922, Malines

Yopôl Godenne (oficirmint Léopold-Charles-Émile Godenne[1]), c' esteut èn imprimeu k' a vnou å monde li 19 di måss 1850 a Malene et k' a morou li 20 d' awousse 1922 dins l' minme veye.

Il a cmincî pa mete sacwants couyonådes e walon etur les bokets di s' gazete e francès «La Réclame», adonpwis il askepia l' prumire gazete e walon di tos les tins, Li Mårmite.[2]

Ouve pol walon candjî

Gn a waire di scrijheus e walon k' ont scrît ostant k' Yopôl Godenne, aprume des couyonådes, et des ôtes rireyes, k' i loméve voltî "Istweres di totes les sôres". Les fåves da Godenne ont stî rprinjhes par après dins totes sôres di gazetes e walon, sins citer l' no d' leu prumî scrijheu.

C' est Godenne k' a apontyî li sistinme ortografike del Mårmite, ki va esse shuvou pa tos les scrijheus namurwès, divant l' arivêye do Sistinme Feller.

Nerén, l' ovraedje da Yopôl Godenne n' a nén stî ricnoxhou, dandjreus a cåze des margayes k' ont avnou inte les scrijheus "do peupe", come les cis del mårmite, et "cotuzeus" del Societé d' Langue. Ces-cial bouxhént tofer sol clå po sayî do rmonter l' livea des belès-letes e walon.

C' est kécfeye po ça eto ki Yopôl Godenne n' est nén rprins, ni dins l' Antolodjeye namurwesse des frés et Lucyin Maréchal, ni dins l' antolodjeye da Piron.

C' est purade pa Léon Pirsoul k' on-z a polou cnoxhe l' ovraedje da Léopold Godenne.

Sistinme d' ôrtografeye Godenne candjî

E sistinme d' ôrtografeye da Godenne, li scrijha OÈ riprezinte li son wè namurwès, ki respond pacô å betchfessî OE pacô nén (memwere).

Sourdant candjî

  1. Live Coppe p. 180.
  2. «Léopold Godenne», dins l' Walon årmonak 1923, p. 235-236.