Li Rantoele (soce)

soce nén recwårlante ki mete å dvant l' lingaedje walon
(Redjiblé di Rantoele-soce)
Pol discramiaedje des årtikes avou l' mot « rantoele & Li Rantoele », loukîz cial.

Li Rantoele, c' est ene soce di waloneus, k' a skepyî e 1995, d' ene idêye da Lorint Hendschel eyet Lucyin Mahin.

On raploû del Rantoele e 2000: di hintche a droete : L. Hendschel, Y. Paquet, P. Otjacques

Istwere candjî

Elle a divnou bénrade (1996) ene SNR, tchôkêye pa Stefane Quertinmont (ki serè l' prumî prezidint), avou eto Pire Otjacques (ki va divni cwårlî), et Tiri Dumont. Dins ses statuts, gn a l' raprindaedje do walon pa les djonnes, et li rfondaedje do coir do lingaedje.

Eto, li soce va mete do côp so pî ene Tåvlotêye Rifondaedje.

C' est ene des prumirès soces ki va roter pår e walon, dins ses raploûs et dins ses scrijhaedjes divintrins. C' est, avou, ene soce ki n' serè måy aloyeye a ene coine del Walonreye. Gn årè des raploûs a Djilî, a Bietris, a Dåvdisse, å Noû-Lovén, a Lidje, a Djiblou, evnd.

Sol pî sol tchamp, li soce va eplaidî ene gazete e walon do minme no, kel prumî limero rexhe e l' esté 1996. Mins c' est purade sol Daegntoele k' ele va bouter. Elle enonde totès sôres di waibes, aprume, li waibe do walon lingaedje (1996), pu l' Aberteke (1997). Ele va ossu produre, di 1998 a 2000, èn årmonak walon.

 
Resconte e l' soce : Lorint Hendschel, Djozewal et Rodjî Viroux (di hintche a droete)

E 1999, Yves Paquet divént prezidint, et enonder les soçnaedjes di Djiblou, la k' on djåze pår e walon, so totes sôres di tinmes, avou des djins d' ådfoû del soce.

E 2000, Pablo Sarachaga divént penleus, et onk des stoks del Tåvlotêye Rifondaedje. Li soce si mete a fé toplin åtoû do ratournaedje e walon des programes éndjolikes. Et mete en alaedje l' esplicant motî do walon, pu, e 2003, l' eciclopedeye Wikipedia e walon.

E 2001, li soce enonde ene pitite colleccion d' lives, po-z eplaidî des scrijhaedjes ki fwaiynut avanci l' walon.

E 2002, li Rantoele passe on laid cwårt d' eure, veyanmint k' ene pårteye des soçons n' est pus po sotni li rfondou walon.

E 2003, li prezidince passe a Lucyin Mahin, ki saye, avou bråmint moens di mimbes, di mintni les bouyes del tåvlotêye rifondaedje, del gazete, des waibes, et del Coleccion Belès Letes.

Li Rantoele a eto ovré so li scolaedje do walon, copuvite avou l' sicrijhaedje rifondou, å Noû-Lovén (2001-2003) et a Bive (di 2003 a asteure).

Les fimes del tévé walon-cåzante (skepeye e dissu Youtube sont eto eplaidîs avou l' imådjete del Rantoele dins l' djenerike.

A pårti d' 2015, li Rantoele prind pårt, tos ls ans, al fiesse ås lingaedjes walons.

E 2018 et 2019, Lucyin Mahin va prezinter l' walon et les ponts del Walonreye do Djåzant atlasse éndjolike dins des raploûs d' linwincieus el France å no del Rantoele.

Hårdêyes difoûtrinnes candjî