Nadine Modolo

Nadine Modolo, c' est ene sicrijheuse e walon do Payis d' Tchålerwè.

Elle a skepyî e 1942.

Ele note l' accint do Bourk (Han-so-Eure).

Elle est vice-prezidinte di l' ALWAC.

Di s' mestî, elle esteut responsåve dins on grand botike.

Ouve e walon

E 1995, elle amonte ene dramatike po ls efants, «les Arsouyes».

Did la, bråmint d' ses scrijhaedjes, c' est des pîces di onk ou deus akes po les efants ou les djonneas.

Mins ele sicrît eto del prôze et del powezeye.

Ses bokets sont-st eplaidîs dins l' Bourdon.

Avou Marie-France Gilles et des ôtes do CHADWE, elle a-st amonté ene farde «Tchansons po nos efants» (2008).

Elle a scrît onk des tchaptrês do live di sovnances «Aviretes et glawinreyes».

Sudjets

Dins l' pitit powinme «on cour po deus», ele djåze tinrûlmint do divoice, on sudjet waire aboirdé pa les scrijheus e walon do 20inme sieke.

Ele shût eto voltî l' actouwalité. Insi, do tins del parminêye 2020-2021, ele sicrijha so les cis k' avént mådjiné fé fé des «vraiyès fåssès vacances» ås amateurs, tot les fjhant monter dins èn avion ki n' diveut nén voler.

Egzimpe di boket

On cour po deus

Il esteut la tot somadjant,

Bén decidé a s' arester.

«Ça sieve a cwè di co toker?»,

Dijheut on tot ptit cour d' efant.

Tot tchôd d' amour, cåzu bolant,

Il aveut tcheu a l' astcheyance

Gonflé d' bouneur et sins mefiyance

Inte on popa ey ene moman.

L' avni por lu, est egadjant;

(I) pinséve ki ça durreut todi.

Et i rdjibléve dins s' pitit ni

Come gn a k' po l' fé, on cour d' efant.

On djoû, on påle tot bas, portant;

Oyi, el fåt pårti a deus.

Mins on frè ça avou doûceur,

Onk pol popa, l' ôte pol moman.

Parints, n' fijhoz nén les ronflants;

Ç' n' est nén åjhey, el vicåreye;

Mins c' est mwints côps po des biestreyes

K' on skete a deus on cour d' efant

Hårdêye difoûtrinne

• Li Wiccionaire si rsieve di sacwantès fråzes da Nadine Modolo po-z enimådjî des mots k' i gn a.
• Vos trouvroz des racsegnes so les ouves da Nadine Modolo, u les ouves zeles-minmes, so Wikisourd e walon.