Li Crikion (on scrijheut L' Créquion), c' esteut ene gazete e walon do Payis d' Tchålerwè, askepieye e 1904 pa ene troke di scrijheus e walon: Oscar Lefebvre, Joseph Modave, Auguste Ranchon et Léopold Surin, k' end esteut l' eplaideu. Li Crikion parexheut tos les semdis, et fé concurince å Tonea d' Tchålerwè ki vudive e minme tins. Åresse, l' idêye esteut di fé do walon ôtmint ki les couyonådes ki parexhént dins l' “Tonea”.

tite del gazete sol prumire pådje
tite del gazete sol prumire pådje

Il a stî eplaidî totes les samwinnes do prumî d' octôbe 1904 å 22 d' decimbe 1906. I fourit eto renondé do 7 d' awousse 1909 å 10 di fevrî 1910. Li Crikion eplaidive des arimés, des monologues, des racontaedjes et des pîces di teyåtes des grands scrijheus d' adon: Adelin Bayot, Auguste Cador, Ernest Légat, Arthur Triffet, et Jean Wyns. Li Crikion djåzéve eto del bouye da Jules Feller po decider des rîles di rashiaedje des pårlers walons. Eyet do prumî pordjet da Djhan Hôss di Diccionaire djenerå do Lingaedje walon. C' est dins l' Crikion, e 1906, ki l' idêye d' ene "soce literaire walone" est atåvlêye. Gn ava måy ki deus djins ddins: Surin lu-minme eyet Arille Carlier.