Dji n' sé sofler

Dji n' sai shofler (powezeye)

Dji n' sé sofler (Dji n' sai shofler), c' est on live di libe powezeye sicrît pa Joseph Dewez, tot tuzant å rwaitî les scultreyes da Jean Willame ahavtêyes å meur di l' eglijhe di Wiyete. Ele riprezintnut li passion d' Djezu-Cri.

Li live a vudî l' an 2024 divins l' coleccion Micromania.

Gn a on ratournaedje e francès vizon vizu.

ISBN 978-2-931107-11-9

Contnou

• (fr) Adrovaedje pa Jean-Luc Fauconnier (p. 3).
• (fr) Divanzouve esplicant kimint k' el sicrijheu a tuzer a scrire çoula, eyet l' tite k' il a tchoezi (p. 5).
• (fr) Po rinde bon dvwer a Jean Willame, avou si biyografeye (p. 6-9).
• Atacmint : i shonne å scrijheu ki les pavés Wiyam årént dvou esse metous a tere et nén ahavtés å meur.
• Shuvnut les 16 tecses so les 1 ôtes sitåcions, come les a schavé sol pire Jean Wiyame (pp. 14-89). Eneviè les 14 eståcions d' on tchmin d' croes classike, li sculteu end a radjouté ene divant (li dierin raploû) ey ene après (Mareye ratind).
• (fr) Rimerciymints (p. 90).

Boket do live (l' atacmint)

al FLW 2024

C' est al tere k' els åreut falou mete
les noers pavés do tchmin del croes;
Seur nén les agritchter å meur !
Al tere, paski, veyoz,
ene pavêye, c' est fwait po k' on rote dissu
et Djezus, lu, i n' a nén dandjî di rwaitants,

i ratind des djins por zels roter avou lu,
so les noers pavés
et treboukî
et s' î sketer s' vizaedje
et poirter s' croes.
Roter so les noers pavés
come on rote so des vizaedjes
et ls etinde si buker
et boerler
et chuchloter
çki Djezus a gravé ddins :
«Bon Diè, pocwè m' avoz leyî tchaire ?
pocwè ?
pocwè ?»

I n' a pont yeu d' response
…et portant, li pavêye riglatit co.

Raloyaedjes a l' eure d' enute

Djôzef Dewé n' est nén on vî magneu d' Bon Diu, ki vike dins des paskêyes did la 2000 ans. Gn a mwints passaedjes di s' live k' el raloye å tins prezint.

Li tite, po cmincî, c' est l' ratournaedje e walon di l' inglès «I can't breath » d' on noer amerikin k' a stî stofé pa on policî ki l' aveut ramassé po ene tchitchêye.

Pådje 23 : les rwaitant criynut sol passaedje di Djezus-Cri poirtant s' croes.

I boerlêynut
i hawnut
come les tchéns
d' Treblinca
i hoûlnut
come les leus
d' Alabama
ou do Rwanda

Pådje 59 : gn a des cmeres ki s' vegnnut dilaminter sol sôr da Djezus, ki les atôtche insi:

Ni breyoz nén sor mi, don,
breyoz purade so vos efants
paski l' måleur ki m' sipråtche tot,
i vos språtchrè, vozôtes eto
dins vosse veye di Djeruzalem
ou a Gaza, a Kigali
oudonbén a Nagazaki
Pôreut vali k' on n' viereut nén ça

Gn a eto des passaedjes sol guere d' Oucrinne (l' angoxhe da Mareye est rmetowe al cene des mames di Marioupol).

Alére

Lucyin Mahin, corwaitaedje do live, Li Rantoele l° 111, erî-såjhon 2024, p. 14.