Diviè l' an cwarante (novele)

Dèviè l'an carante

Diviè l' an cwarante (Dèviè l'an carante), sortitré «sovnances rasserceyes» (sovenances rassërcîyes), c' est on live di sovnances sicrît a môde di roman pa Emile Gilliard.

Il a vudî e 2017 dins l' pitite coleccion di l' SLLW, dizo l' limero 40.

Tinme

Come si no el dit, on djåze del guere di 40. Mins purade tot s' metant dins l' pea des djins dei deus viyaedjes d' avår ci.

Po on prumî, Måyin e moes d' setimbe 1944, cwand les Almands sont retchessîs di leus pôzucions so Mouze.

Adonpwis, Moustî, et pår li vicåreye dins l' grande sicole ki s' aveut fwait dins l' ancyin tchestea et l' vî moustî.

Adjinçnaedje do live

Li prumî tchaptrê (pp. 9-27), etitré "Setimbe 44; on shofele", mostere li societé d' on ptit viyaedje des boirds di Mouze, la k' gn a yeu les dierinnès bates di canons. C' est Måyin.

Li deujhinme tchapite (pp. 29-43), c' est on ralaedje e-n erî et on si rtrouve li 10 di may 1940, cwand les Almands ont-st abroké el Beldjike. Li sinne est veyowe del Basse Sambe, dilé Rodjimont.

Li troejhinme boket (pp 45-51, etitré: «Setimbe 44: on spepeye») raconte les djoûs k' ont shuvou l' liberåcion. Avou les ragaiyixhmints come les bals a l' improvisse avou ls Amerikins. Mins eto li tondaedje des comeres k' avént coûtchî avou ls Almands. C' est fok adon ki l' mwaisse persounaedje del fén do live si vént mostrer. On l' lome Djo (Jo). I vént d' esse egadjî professeur al sicole di Moustî.

Li cwatrinme pårteye (pp 53-67 «Tot do long do rixhot; li Djo et ls ôtes») nos essinne li resconte do Djo avou on drole d' apoticåre: on Rûsse ki djowe ene air di piyano si strindante ki l' djouweus et l' schoûteu end ont les låmes ås ouys. Djo fwait moussî l' ome avou les cis ki s' catchèt dins l' covint, po ene råjhon u l' ôte, k' on n' elzî dmande nén. Il î sont-st eployîs come ovrîs.