Déme

Li déme, dins l' monde crustin, c' est ene taeye k' on dveut dner a l' Eglijhe, dizo l' Ancyin Redjime, et ki fjheut sovint li dijhinme des dinrêyes.

Li déme a stî payeye disk’ al fén di l’ Ancyin Redjime (ele ont stî anixhilêyes al Revolucion francesse).

Motlî

Li ci ki vneut ramasser les démes si loméve li démeu. On djheut eto : li pikeu.

Paymint del déme

On pleut aveur puzieurès démes dins l’ minme viyaedje. Insi, Ôvîfa diveut redîmer les princes-abés di Ståvleu, ey eto l’ signeur di Rénastinne.

Les payizans divént leyî les dinrêyes dins les tchamps, disk’ a çki l’ démeu vegne prinde li pårt do signeur.

Les djåbes divént esse metowes a dijhea, po-z awè pus åjhey. Li payizan diveut houkî troes côp  : « démeu ! »

Li frawtineu esteut gadjî di cwate côps l’ déme, å prumî côp k’ il esteut prins. Li deujhinme côp, c’ esteut 8 feyes. Li troejhinme côp, il esteut tchessî foû do ban.

Rishonnance avou des sistinmes vijhéns

Ele rishonne foirt al déme des dinrêyes dins li rlidjon muzulmande, mins cisse-cial va direk ås pôves, et ele n' est nén prinjhe di foice.