Commission des Écritures et du Livre
Comission des Scrijhaedjes et do Live (ministere del culteure del Federåcion Walonreye-Brussele)
Li Comission des Scrijhaedjes et do Live (e francès, li Commission des Écritures et du Livre), c' est ene institucion k' a stî metowe so pî pal Federåcion Walonreye-Brussele e 2019, po dner å Govienmint des avizes so les dmandes di subzides.
C' est ene des institucions k' a replaecî l' vî Consey des Lingaedjes do Payis, mins ele ni s' ocupe nén d' consyî l' Govienmint so les kessions d' politike linwistike (çoula, asteure, c' est l' role do Consey do Lingaedje francès, des Lingaedjes do Payis et des Politikes linwistikes).
Li Comission est cpårteye e diferinnès tropes ki boutnut tchaeke so ene sôre di dmandes. On lome ces tropes des « sessions ». I gn e-n a shijh :
- Li session des belès-letes e francès
- Li session des bindes d' imådjes
- Li session des lives d' imådjes et des lives pol djonnesse
- Li session des lingaedjes do payis
- Li session « spårdaedje » (Session Diffusion, e francès)
- Li session « edicion »
Les dmandes po on pordjet e walon sont todi studieyes pal session des lingaedjes do payis, minme si c' est po fé ene binde d' imådjes u on live pol djonnesse. Les mimbes del session dinnut leu-z advize, mins c' est todi l' minisse del culteure ki decide di dner on subzide.
C' est eto l' session des lingaedjes do payis ki relét les mimbes des djuris des pris del Federåcion Walonreye-Brussele, mins i fåt todi kel minisse fouxhe d' acoird avou l' lisse des djurés.
Li fonccionaire responsåve del session des lingaedjes do payis del Comission des Scrijhaedjes et do Live a d' abôrd stî Alix Dassargues (2019-2021), pwis Julien Noël (dispu 2022).