Bovesse

Bovesse, c' est èn ancyin ptit ban del Walonreye, rebané avou des ôtes viyaedjes do cotoû po fé l' novele comene des Brouwires, e l' province di Nameur.

Mwaissès dnêyes

• Limero del posse: 5081 (vî limero 5850)
• Limero diyalectolodjike: Na 46
• Arondixhmint: Nameur

Djeyografeye

Avou si stindeye di 409 ectåres, Bovesse est l' pus ptit viyaedje des Brouwires.

E 1840, i gn aveut 325 dimorants. Li prumî d' djanvî 2005, i gn aveut 886 dimorants.

Tins des vôtaedjes do 13 di djun 2005 (Pårlumint Uropeyin et Consey Redjonå Walon), gn aveut 654 djins d' inscrîtes sol lisse des vôtants. Li nombe di vôtant a rhåssî di 21 djins enèviè les eleccions ledjislatives do 18 di may 2003.

Istwere

Li sourdant do no vénreut del fôme romane di Bovesch (bén ki, disk' asteure, on n' åye pont trové d' traece materiele di l' ocupåcion rominne).

A 14e sieke, Jacquemin di Bovesch tént on fî consecant e ban do Feix : i s' adjit del signeurreye del Vå (Mohimont et l' distilreye).

Cisse signeurreye la passe e 1450 ås d' Oultremon k' el wådront disk' e 1725.

Li pårteye feyodåle passe å Conte di Hoen divant di esse rivindowe e 1743 å Conte di Balåsse.

E 1759, ele passe å Conte Cornet d' Elzius k' î egzercéve li pouvwer di hôte, moyene et basse djustice.

Tant k' al signeurreye foncire, cisse-ciale est vindowe e 1757 a Nicolas Passquet po l' pårteye cinsrece; po l' pårteye feyodåle, li tchestea et ses dpindances estît vindous a Renir Marchand di Mierdo.

E 1780, li tchestea et les dpindances tchairont a Renier Marchand, li fi do ci di dvant (tchenonne di Cînè)

Demografeye

Gn aveut des djins d' Bovesse po-z ebaguer eviè l' Wisconsene sol difén do 19inme sieke.