André Gauditiaubois

André Gauditiaubois, c' esteut on scrijheu e walon, k' a bråmint fwait des cåzaedjes di tchansons.

croxhî pa José Schoovaerts

Stéphane Quertinmont a hintche avou André Gauditiaubois padrî a droete, e 2000

Il a skepyî a Dårmè li 2 d' awousse 1949. Il a morou a Gochliye li 28 di may 2021.

Riprins dins l' antolodjeye «Pou lès dîj ans du p'tit» (scrijheus des 10 prumirès anêyes do Bourdon dizo cogne A5 (pus ptite ki les prumîs k' estént so A4).

Ouve e walon

Il a-st aprins l' walon avou s' grand-mame di Nivele, et a cmincî pa spepyî l' Coppens, po ecråxhî s' vocabulaire. Mins il a raddimint rcweri ses mots did pattavå l' Walonreye, et minme sicrire des tchansons avou l' accint d' Lidje u di Ståvleu.

I fourit purade kinoxhou come cåzaedjisse da William Dunker, mins il a fwait eto des paroles po mo des djonnès tchanteus et tchanteuses. Eto, il a "wangnî" dipus d' on côp des pris å Grand Pris del Tchanson e walon, pu des Fiesse del Tchanson e walon.

Lu tot seu, il emantcha ene sitroete plake avou del muzike éndjolike et do cåzaedje, Roudje Orandje. Li plake a stî esplikêye dins on rapoirtaedje so ene tchinne di radio francesse (France 2).

Il a eto scrît des noveles. Sacwantes ont stî eplaideyes so l' Aberteke.

Il a scrît on tchaptrê do live Ké walon po dmwin ?, adjinçné pa Lucyin Mahin.

Des minmes trevéns, i bouta avou Pire Otdjåke et l' S.N.R. Li Rantoele sol sitroete plake Emacralaedje. C' est minme lu el pus impôrtant des contribouweus ås tecses, avou cénk cåzaedjes e walon d' Lidje, et troes e walon do Coûtchant.

Sovni di s' moirt dins l' Rantoele-gazete

Vola cmint ki s' moirt fourit-st anonceye dins l' Rantoele-gazete:

André Gauditiaubois a dhoté a Gochliye li 28 di may 2021.
Li walon pied on grand ome, ki n’ aveut nén sogne di mostrer k’ i n’ esteut nén d’ acoird avou les pus wårdiveus dins les waloneus. Et ki l’ walon si dveut poleur tchanter di Lidje a Tchålerwè avou les minmes tchanteus, et des tecses rimetåves e rfondou.
Dandjreus k’ i wigne co dins les penes e paradis cwand il î rescontere des waloneus wårdiveus, mins k’ il a fwait camaeråde avou les Forir, Pirsoul, Boxus, Albert Lallemand, Rodjî Viroux et Francis Baudoux (ki n’ estént nén todi d’ acoird avou l’ eståvlixhmint).

Årvey, André ! Dj’ årans l’ tins long après twè, al soce Li Rantoele, la k’ to nos evoyives voltî tes tchansons (dji m’ permete di l’ atouwer ca c’ esteut on vraiy soçon).

Hårdêyes difoûtrinnes

• Li Wiccionaire si rsieve di sacwantès fråzes da André Gauditiaubois po-z enimådjî des mots k' i gn a.
• Vos trouvroz des racsegnes so les ouves da André Gauditiaubois, u les ouves zeles-minmes, so Wikisourd e walon.
• Pådje moennrece des scrijhaedjes André Gauditiaubois (so l' Aberteke) (e rfondou)
• Sacwants scrijhaedjes (sol waibe "Li walon d' emon nozôtes") (mwaissès modêyes)
• (fr) Schoûtez ses powinmes et tchansons