Tiret

On tiret c' est on sene di pontiaedje ki sieve a:

• marker ene ristitcheye fråzlete, li metant insi e-n avant dins l' etcherpetaedje del fråze. eg:

Après les pelrinaedjes al potale do passé eyet come ça dveut ariver on djoû, — l' cawe do tchet a bén vnou — dj' a yeu ene pitite cwåte di mes parints, ene pitite cwåte ki vneut d' Djilî.

• mostrer on candjmint d' cåzeu dins des diyalogues. eg:

– S' i vs plait… dessinez m' on bedot!

– Di cwè?

– Dessinez m' on bedot…

I n' fåt nén s' brouyî inte li tiret eyet l' loyeure, cisse dierinne est on sene d' ortografeye, ou pa côps on sene di pontiaedje avou, mins po mostrer k' on mot a stî côpé. Li loyeure est sovint pus coûte ki les tirets, eyet avou moens d' vude po l' ataetchî åzès mots; cwand on n' a nén di fontes tipografikes (metans, e peur ASCII, ou avou ene viye machine a scrire mecanike), on eploye «-» pol loyeure, eyet «--» ou «---» po les tirets (po «–» et «—», tirets tipografikes del lårdjeur do N et do M, respectivmint), mins on pout eto eployî «-» pol tiret avou.

Li tiret est ossu diferin do sene matematike moens («-», ki s' ecôde del minme manire kel loyeure dins les copiutreces), ki lu a-st on sinse matematike.