Sujet sur Uzeu copene:Èl-Gueuye-Noere

Bondjoû,

Dj'a d'djà coplé tènawète à scrîre oudôbin coridjî saquants-ârtikes su l' Wikipédia walon. C'è-st-on ègzêrcisse qui dj' faî co bin voltî quand dj'a do timps pad'vant mi. Èt c'è-st-èto avou brâmint do plaîji di d'ner on côp di spale po fé crèche li Wikipédia walon avou dès noûs-ârtikes oucobin dès corijadjes.

Adon, dji m' vos vin d'mander saquants-èspliquéyes, dèdjà pace qui c'èst l' prumî côp qui dj' créye mi prôpe compte d'ûseû su Wikipédia ; mins èto pace qui quand dj'aveu mi-minme dècidé d' sicrîre on-ârtike ou l'ôte (c'èst mi par ègzimpe qu'aveu scrît su l' sanctuwaîre do Bwès dès Noyés doubin d'awè d'mandé d' fé on djaurnon d'ârtike su l' Belgischer Rundfunk), dji veu todi qu'on m' dît qui m' manîre di scrîre n'èst nin corèc' po ç' site-là. Dj'a studyî l' walon al sicole di walon d' Nameur, dji n' sé don nin comint qu'on scrît è r'fondu. D'abôrd, come i m' chone qui l' sicrîjadje è r'fondu d'mère impôrtant po vos-ôtes, dj'aureu v'lu sawè s'i-gn-aveut on site po n's-èspliquer comint qu' nos li scrîjans ou au mwins awè saquants-èspliquéyes su l' manîre d'aler dèl coche walone da Wikipédia.

Di d'vance, on fèl mèrci po vosse rèsponse ^^

Bondjoû @Xindes,

Wilicom d' aboird amon nozôtes. Çoula nos fwait bråmint plaijhî d' awè on novea uzeu ki ns dene on côp di spale. :-)

Dji n' a nole sovnance po li "Bwès dès Noyés", mins dji m' sovén bén ki dj' aveu askepyî l' årtike sol Belgischer Rundfunk, sorlon vosse dimande. Come di djusse, tos les uzeus walon-cåzants roci scrijhnut voltî avou l' rifondou. Des ortografeyes e walon, i nd a totplins. On-z a tchoezî li rfondou paski c' est l' seu ki såye d' esse comprindåve dins tote li Walonreye linwistike.

Dji n' a måy calindjî ene sakî po-z awè scrît èn årtike e Feller ubén ene ôte ortografeye k' on pôreut uzer, tot scrijhant l' walon. Po-z asprinde el rifondou, i nd a ene pekêye di waibes ki porént esse ahessants po vozôtes. Houte di çoula, dji les uze todi ; dji les uze minme asteure, pindant ki dji vos scrî ces kékès lenes :

- Motî e rfondou, mins avou d' ôtes sistinmes ortografikes walons

- Wiccionaire (èn ôte motî e rfondou avou d' ôtes sistinmes ortografikes walons eto)

- Codjowaedje e rfondou

- Croejhete e rfondou

Si vs av dandjî d' ôtès esplikêyes, ni tchictez nén a vni m' el dimander so m' pådje. Dji sreu foirt binåjhe d' vos aidî. ;-)

Amiståvmint,

Èl-Gueuye-Noere