Pårti Bedje do Boutaedje

Parti du Travail de Belgique / Partij van de Arbeid van België

Pårti Bedje do Boutaedje

Prezintaedje
Askepiance	1979
Coleur politike	Rodje
Prezidint	Raoul Hedebouw
Payis/ Redjons	Beldjike - Redjon d' Brussele - Flande - Walonreye

Li Pårti Bedje do Boutaedje, ki l' no oficir e francès, c' est Parti du Travail de Belgique ey e neyerlandès Partij van de Arbeid van België, c' est on pårti k' est spårdou dins cåzumint tote li Beldjike. Mins il bråmint pus di vwès e l' Walonreye ey a Brussele k' e l' Flande.

Il est rwaitî sovint come on pårti d' gåtche. Kécfeye ossu come on pårti d' foite gåtche, veyanmint k' i disfindèt ene ideyolodjeye comunisse (marsisse).

Istwere

Li Pårti Bedje do Boutaedje a-st askepyî e 1979, al shûte des mouvmints des studiants tins des anêyes 1960 (May 68). Ça fwait ki ç' pårti la a-st erité d' ene avuzion marsisse-leninisse do comunisse, avou sacwantès influwinces maoyisse eyet stalinisse. Mins nerén, asteure, li pårti saye di fé dfiner ces influwinces la.

Dispoy les anêyes 2010, li PBB ragregne bråmint des vôtaedjes.

Rilomés djins

Vicant

• Marc Botenga
• Raoul Hedebouw
• Sofie Merckx
• Peter Mertens
• Germain Mugemangango

Revoye

• Ludo Martens

Mouvmints aloyîs

Comac

Li Comac, ubén li Comité d'Action Communiste ([WA] Comité d' Accion Comunisse), c' est on mouvmint d' djonnes. Il est prezint dins des univiersités eyet des hôtès scoles bedjes : l' Univiersité d' Mont, paregzimpe.

Il aveut skepyî e 2001, do rabindlaedje di deus mouvmints : li MML ([FR] Mouvement marxiste léniniste - [WA] Mouvmint marsisse leninisse) eyet Rebelle ([WA] Carcan).

Marianne

Troke feminisse do pårti.

Medcéns pol peupe

I s' adjixh d' ene orgånizåcion raloyeye å PBB, askepieye pa Sofie Merckx.

Pionniers

Mouvmint do PBB po les efants.

RedFox

Dins l' minme djinre k' el Comac, gn a l' RedFox, k' est ossu on mouvmint d' djonnes, mins po les cis etur cwatoize eyet dijh-ût ans.

Polemike

E decimbe 2019, Peter Mertens, prezidint do PBB, a rescontré Tom Van Grieken, li prezidint do Vlaams Belang. I dveut passer avou lu al tévé dins l' emission del VRT, "De Zondag". Çoula a maké sacwants politikîs walons, come Denis Ducarme u co Ecolo.

Idêyes so l' adjinçnaedje del Beldjike

Li PBB a purade on calpén beldjikin (ataetchî a l' unité del Beldjike). Ça fwait: li pårti ni sereut waire assaetchî viè on confederalisse (refoircixhaedje des povwers des redjons).