Noere oraye di tchet

Li noere oraye di tchet est, come si blanke couzene, on tchampion foirt corant del famile des elvelacêyes.

noere oraye di tchet

Helvella lacunosa (Foto: Jean-Pol Grandmont).

Ringne:	Fungi (tchampions)
Ecoxhmint:	Ascomycota
Classe:	Hymenoascomycetes
Dizo-classe:	Pezizomycetideae
Ôre:	Pezizales
Famile:	Helvellaceae
Djinre:	Helvella
Espece:	lacunosa

Discrijhaedje

Tchampion (3-10 cm) fôrmé d' on gris-foncé a noer tchapea, avou ene fôme di sele ou ene conformåcion pus ou moens cafougneye ou lobêye, avou on gris pî k' a des parfondès royes so tote si hôteur. Li tchå est tene, ridjide, elastike et sins odeur. I vént al tere ossu bén dins les clairs et frexhs bwès a foyes (pus rålmint dins les sapéns) li long des pazeas, ki dins l' yebe, les håyes et les hourleas des pateures. On l' trouve di l' fén del bele-såjhon djusk' a l' fén d' l' årire-såjhon.

Eployaedje

C' est on tchampion k' on pout mougnî (tocsike cru) apres aveur pris l' précôcion di l' bén cure et di taper å diåle l' aiwe k' a siervou a l' cure.

Bibliografeye

Tites des lives e francès k' i gn a avou pus di racsegnes so ç' tchampion la:

Régis Courtecuisse, Bernard Duhem: Guide des champignons de France et d'Europe (Delachaux & Niestlé, 1994-2000).
Marcel Bon: Champignons de France et d'Europe occidentale (Flammarion, 2004)
Dr Ewaldt Gerhardt: Guide Vigot des champignons (Vigot, 1999) - ISBN 2-7114-1413-2
Roger Phillips: Les champignons (Solar, 1981) - ISBN 2-263-00640-0