Oraye di tchet

L' oraye di tchet est l' tchampion li pus corant dol famile des elvelacées.

Oraye di tchet

Helvella crispa (Foto:Jean-Pol Grandmont);

Ringne:	Fungi (tchampions)
Ecoxhmint:	Ascomycota
Classe:	Hymenoascomycetes
Dizo-classe:	Pezizomycetideae
Ôre:	Pezizales
Famile:	Helvellaceae
Djinre:	Helvella
Espece:	crispa

Discrijhaedje

Tchampion (6-13 cm) fôrmé d' on gris-blanc djaene-brun pâle tchapea e fôme di sele (3 a 5 cm di hôt) k' est foirt cassant, avou ene conformåcion pus ou moens cafougneye ou lobêye, avou on blanc pî k' a des parfondès royes so tote si hôteur (2-8x1-2,5cm). Li tchå k' est elastike divént vite coriace. Djonne i n' sint nén grand tchoi mins atrape ene doûce odeur tot divnant pus vî.

I vént al tere ossu bén dins les clairs et frexhs bwès a foyes (pus rålmint dins les sapéns) li long des pazeas, ki dins l' yebe, les håyes et les hourleas des pateures. On l' trouve di l' bele-såjhon djusk' a l' fén d' l' årire-såjhon.

Eployaedje

C' est on tchampion k' on pout mougnî (tocsike cru) apres aveur pris l' précôcion di l' bén cûre et di taper å diåle l' aiwe k' a siervou a l' cure.

Bibliografeye

Tites des lives e francès k' i gn a avou pus di racsegnes so ç' tchampion la:

Régis Courtecuisse, Bernard Duhem: Guide des champignons de France et d'Europe (Delachaux & Niestlé, 1994-2000).
Marcel Bon: Champignons de France et d'Europe occidentale (Flammarion, 2004)
Dr Ewaldt Gerhardt: Guide Vigot des champignons (Vigot, 1999) - ISBN 2-7114-1413-2
Roger Phillips: Les champignons (Solar, 1981) - ISBN 2-263-00640-0
G. Becker, Dr L. Giacomoni, J Nicot, S. Pautot, G. Redeuihl, G. Branchu, D. Hartog, A. Herubel, H. Marxmuller, U. Millot et C. Schaeffner: Le guide des champignons (Reader's Digest, 1982) - ISBN 2-7098-0031-4