Mårlire

Ene mårlire (on dit eto: mårloye), c' est ene plaece la k' on-z î saetche, u k' on-z î a saetchî al måle. Gn a la des trôs dins tere ki sont rcovrous pa del fene tere, et k' on pout toumer dvins. Les mårlires sont bounes po-z î mete des vegnes. Ene pitite mårloye, c' est on mårloyea.

Ene grande mårlire

Po l' etimolodjeye et les vî(s) scrijha(s) : riloukîz a mårlire.

Les mots "mårlire", "mårloye" dins les nos d' plaece del Walonreye

• mårlire:
  • ås Mårlires: no d' ene plaece di Malonne (so plaece: aus Maurlêres).
  • les Mårlires: no d' ene plaece di Welin.
  • El Mårlire: no d' ene plaece d' Esneu, di Viyé-ås-Tours.
  • Mårlire: no d' ene plaece di Moucron (so plaece: Marlière).
  • Les Mårlires : no d' ene plaece di Djerpene (so plaece: aus Maurlêres, F. Morlaires).
• Mårloye (Wahå) :no d' on hamtea k' a divnou on gros bork dins l' grand Måtche.
• Mårloyea no d' ene plaece di Flobek (so plaece: Marloyô).

Istwere des mårlires

Les ancyins Bedjes saetchént dedja al måle po mårler les surès teres. L' ecråxhaedje al måle a ndalé crexhant disk' å mitan do 18inme sieke. Adon, dins les louwaedjes di cinse, c' esteut sovint mårké kel louweu diveut mårler les teres. Å cminçmint do 20inme sieke, gn aveut co sacwantès mårlires k' on-z î tiréve al måle. Mins après, on ls a rispoté al varade, et gn a pus nouk ki sait wice k' elle estént. Ça fwait k' i pout gn aveur des accidints di pormoenneus ki toumèt dins on trô.

Les mots "mårlire", et "mårloyea" dins les nos d' famile et l' sipotaedje el Walonreye.

• Les nos d' famile ki si scrijhèt Marlair, Marler, Marlaire, Marlière sont des nos d' provnance, di des djins ki dmorént en ene plaece k' on lome "Li Mårlire", dizo disfondowe mârlêre (payis d' Nameur et Tchålerwè), u e picård marlière.
• les Mårloyeas (so plaece Maurloya), c' est come ça k' on spote des djins d' Nålene et d' Marbwê.