Laton

Li laton, ou pus coranmint les latons (on dit eto des grus) , c' est les pus gros des restants do molaedje ki rexhèt del boultreye. Après les latons, on rsaetche co les raboulets po-z aveur del fleur.

Uzaedjes

amagnî po les biesses

Come tchevixhance po les biesses, il ont l' advintaedje d' aveur co assez bén d' proteyenes. Divant les alimints d' comiece, il estént rcwerous po nouri les vatches laeçreces. Sifwaitmint po les poyes ponresses. Et copurade po les pourceas, dinltins dins les cabolêyes.

I gn a co del filasse divins, ey adon, ça convént bén ås robetes.

Dins les amagnîs foirt nourixhants (polets d' poytreye), on n' è dvreut pont mete.

Come riméde

Les latons ont siervou po bråmint des rmédes.

On fjheut on bagn ås latons po-z adoûci les egzemas.

On tchåféve on ptit saetch di laton po les mås d' dints ou d' vinte (pol mete sol plaece ki fwait må).

Po les mås d' vinte, on conseye co di magnî des latons. Il apoirtèt del filasse ki manke sovint dins les ritches magnxhons avou bråmint do blanc pwin et del tchå. I vont insi esse des essaitchants pol magnant må do gros boyea.

Ôtes uzaedjes

On ls eployive po bôrer des popes.