Herleme Jürgen Conings

Jürgen Conings, c' esteut on sodård flamind k' aveut stî l' ome el pus ricwerou pindant les moes d' may eyet d' djun di l' anêye 2021. Il a nexhou li 28 di setimbe 1974, a Maaseik. Il a ndalé pindant ès petaedje-evoye.

Biyografeye

Jürgen Conings esteut coporå po l' armêye di l' air ey instruk do tir. Houte di çoula, il a toursi po l' armêye dins des ôtes payis come el Bosneye, el Kosovo u core l' Irak.

Herleme

Råjhon

Come di djusse, il aveut evoyî, a s' feme, ene lete d' åtreuvizom. Seulmint, l' armêye s' a rindou conte k' il a prindou totplins d' åres, çki fwait k' il esteut foirt ricwerou. El polisse eyet l' armêye pinsént k' Jürgen Conings s' muchive dins on bwès nén lon d' ès måjhone, åtoû d' Dilsen, ene comene del province do Limbork. Al copete do mårtchî, i sereut djondant des mouvmints d' foite droete. E-n efet, i sereut mimbe d' ene organizåcion d' foite droete flaminde lomeye : Vlaams Legion. Sortoit k' dins l' årtike, on voet des simboles uzés voltî pa les nazisses so l' oto do prezidint d' èç mouvmint flamind la.

Avou ça k' il aveut mancî Marc Van Ranst (on viroloke flamind), el task force bedje conte li cronivirûsse avou l' govienmint federå. Houte di çoula, il åreut mancî des bastimints d' rilidjions, come les moskêyes.

Adjinçmint

Les polisses bedje eyet neyerlandesse estént so lu, la k' Interpol s' aveut melé eto. Il esteut å livea 3 des mançaedjes di l' OCAM ; pus pindant l' herleme, ciste organizåcion la aveut monté el livea disk' a 4. Mins nerén, el Minisse federåle del Djustice, Ludivine Dedonder, n' el saveut nén. Tenawete, padvant tot çoula, Jürgen Conings esteut ddja shuvou på siervices bedjes di racsegne.

Messaedje trové so les rantoeles di soçnaedje po l' sopoirter.

Politike

Jürgen Conings esteut mimbe do Vlaams Belang disk' al fén del anêye 2020. Totfeye, i n' a nén payî po dimaner mimbe e 2021. Cwand des djins avént dit çoula a Tom Van Grieken, i leu-z a dit k' i n' est nén responsåve d' ses mimbes. Houte di çoula, li prezidint do Vlaams Belang a clatchî k' i n' est nén fir del herleme ki Jürgen Conings a kerlé.

Revoyance

Coreu-evoye

Jürgen Conings a stî ritrové moirt dins li bwès d' Dilserbos, djondant l' viyaedje di Dilsen, el province do Limbork. Cisse novele ci a stî acertinêye på Federå parket. I shonne s' awè sucidé avou ene åre, dit-st i. Tenawete, des djins ni croeynut nén cisse teze. C' est on tchesseu k' aveut discovrou l' coir då sodård. Houte di çoula, el tchesseu, come des ôtes passants eyet ciclisses, il aveut eto odé ene pufkene djondant Jürgen Conings. Marc Van Ranst, el viroloke k' aveut stî håsplé pa lu so ene rantoele di soçnaedje, est solåcyî d' asprinde çoula.

Marc Van Ranst eyet des politikîs ; inte di zels, Theo Francken yet Tom Van Grieken ; ont fwait brotchî foû leu-z ecoraedje a s' famile. Totfeye, el messaedje da Tom Van Grieken a stî disfacé pa Facebook. Come d' efet, l' onk des poite-messaedjes d' èç eterprijhe rola a assené k' el prezidint do Vlaams Belang a stî conte el reglumint. Cist ome la a rwaitî ci disfaçaedje ci tot-z estant del cinseure. I gn a des politkîs k' ont, nén seulmint brotchî foû leu-z ecoraedje a s' famile, mins ils s' ont ossu stî so s' tombe po l' adegnî : c' est l' cas da Hervé Van Laethem (prezidint do Mouvmint NATION).

Do costé des sopoirteus do sôdårds, i s' ont rashonné e Dilsen-Stokkem, el dilon padri s' revoyance. Come d' efet, c' est li plaece wice k' el coir a stî ritrové. Bråmint d' rindes bon dvwer ont stî riçou vinant d' ses sopoirteus.

Sintince

Sorlon el minisse del disfinse pindant cist herleme ci, Ludivine Dedonder, i gn a bråmint des djins di l' armêye k' ont stî schåyîs padri awè stî rwaitî tot-z estant riskeus pol societé. D' ôtes ont rimarké k' i gn a yeu bråmint des mancmints do costé des siervices di racsegne eyet avou les rîles rwaitant li fraite ås åres. C' est çki rihante d' on rapoirt do Comité R. On djåze d'dja k' i gn årè des candjmints dins l' årmêye bedje.

Sorlon ene gazete flaminde, el adjinçmint åreut costé 847 045 €.

Après

Ås alintoûs do 19 di djun 2023, èn Anverswès a stî codåné a-z esse egayolé avou sursis pindant deus ans. On-z a ertrové des emiles k' il evoyive a Jürgen Conings. Les deus omes cåzént d' aprester èn atacaedje.