Fråzlete vo l' la

Li fråzlete «vo l' la», c' est ene fråzlete di mostraedje d' ene sacwè ou d' ene sakî, metou tot près u å lon.

Sintake

E rfondou walon, on-z a ptchî di mete li mot nén candjåve vo al tiesse del fråzlete. I rprezinte ene viye cogne do cmandeu do viebe vey

Il est shuvou d' on prono d' djin coplemint, ou pår d' on prono pårtixhrê. Ci prono la si spotche å pus sovint, s' il a ene sipotchåve voyale.

Adonpwis, n a l' adviebe di mostraedje: la (si c' est co assez lon, ou si c' est aprepiant); ci, cial, po ene sacwè u ene sakî k' est tot près. Mins, come on l' mostere, ça n' est djamåy bén lon, et les cwate adviebes polèt esse metous come piron-pareys.

L' adviebe pout s' abetchter d' ene betchete ri-.

Les troes mots sont scrîts sins loyeure.

Egzimpes

Sinse prumî

• Waitîz nosse coreu walon! Vo l' la ki passe al tiesse di l' eschapêye!
• Vo-z è rla co, des standes avou des lives e walon!
• Vo lzès la pierdous, wai, asteure! et k' on lzî a hapé leus axhlåves k' estént dins les roucsaks.
• Vo t' cial avou t' kipak! Et ti croes k' dji ti rprindrè!
• Vo nos ci arivés divant l' pus bea monumint del veye!

Dins des ratourneures

• vo m' la crås avou ça!
• Bén vo t' la bén!
• vo ndè la ene tone!

Dins les accints do walon

Dins les accints do walon, e 20inme sieke, ciste emantchåjhe la esteut co corante dins l' walon do Mitan et do Coûtchant, foiravant po les pronos simpes.

Mins dins tos les accints, li sintake a môde francesse (prono + v(o) + adviebe raloyî a «vo».

Hårdêyes difoûtrinnes

• Egzimpes di fråzletes so ç' modele la (so l' Aberteke)