Floriconte då sint Nicolai
Li floriconte då sint Nicolai, c' est on floriconte ki mete el sinne sint Nicolai et on botchî k' aveut touwé troes ptits efants, ki l' bon sint va fé raviker.
Rascourti
candjî
Gn a veut on côp, e l' Azeye mineure, èn eveke k' on loméve Nicolai ki s' diveut rinde å Concile di Nicêye.
I s' aveut anuti dins on grand bwès, et i cwereut après ene djîsse po passer l' nute, aspoyî so s' crosse d' eveke, et moennant si ågne avou ses bagaedjes.
I voet ene loumrote å lon, d' ene wåmire, et il î va bouxhî a l' ouxh.
I toume amon on mangon ki lyi vout bén bayî djîsse et soper.
Tot ratindant ki l' botchî finixhe di cotaeyî ene biesse, sint Nicolai ni s' sint nén a si åjhe. Mins i n' sait nén pocwè. Tot s' on côp, l' anea k' il a å doet si mete a rglati. Gn a ene pirete ki s' endè dismantche, et l' anea lyi dit cwè åd fwait do botchî ki l' riçût.
La set ans did la, gn aveut yeu ene abominåbe pômagne sol payis. Troes gaméns s' avént vnou piede dins l' grand bwès, et dmander å botchî po s' ecahouter pol nutêye. I ls aveut ascoyî, mins ls aveut touwé, et wårdé å saloe.
Mins la l' botchî k' intere, et l' bague ridvént come divant.
Li botchî lyi dmande çou k' i vout po soper.
- on pougnet d' pourcea ? do djambon ? on rosti ? di lård ?
- Neni, dit-st i l' sint Nicolai, dji vôreu bén del salêye tchå ki t' as dispu set ans dins t' saloe.
L' ome a dmoré ståmusse. I veyeut bén ki l' voyaedjeu aveut discovri l' potêye.
Et l' grand sint ndaler disk' al cåve, lever l' coviete do saloe, et prinde les ptits doets ki briként... et haetchî troes ptits roufions, pårlants-vicants, foû do saloe.
Cwand l' mangon (ki s' loméve "Hanscroufe") a veyou l' miråke do ravicaedje des efants, il a zoupté evoye, et cori come li vint d' bijhe ès muchyî dins l' bwès.
Les efants, ki n' avént pus magnî dispu 7 ans, on fwait ene cråsse gasse avou totes les amunicions del mangonreye. C' est a ç' moumint la ki Hanscroufe a rapliké, tot peneus. Et s' taper a djno divant l' veke po dmander pardon å Bon Diu.
Come sint Nicolai kimincive a esse escran cwand i fjheut ses tournêyes po les efants, il a tuzé a çouci : Hanscroufe vénreut avou lu. Il åreut todi ene sicoreye po zingler les efants k' avént stî metchants.
Coleur di pea des persounaedjes
candjîSint Nicolai d' Mira esteut ene djin avou ene morete pea. Mins, tot l' tins des gueres inte les crustins et les "Sarazins", les cis di cisse coleur la estént purade loukîs come des djins a vey evi. I faleut don rprezinter on blanc sint. Li noere coleur di pea, c' est Hanscroufe k' end a erité. Avou l' discovraedje di l' Afrike noere, ça va divni cråndimint on negue.