Des hommes et des dieux

Des omes et des diès (fime)

Des hommes et des dieux (Des omes et des diès), c' est on fime prodût pa Xavier Beauvois, et k' est rashiou so l' afwaire do touwaedje des moennes di Tiberene e 1996.

Li fime a stî mostré pol prumî côp li 18 di may 2010, al bate oficire del Fiesse des fimes di Cane. Il î a rascodou l' pris do djuri.

Il a rçû, li 25 di fevrî 2011, li cezår do meyeu fime po l' anêye 2010.

Bate di dvizes sol tite

Teyolodjicmint, li tite francès nén pus ki l' ratournaedje e walon mot po mot (d«es omes et des diès»), ni sont djusses. Li meyeuse manire di dire sereut motoit : « des djins et des manires diferinnes di siervi l’ minme Bon Diu ». Mins ci n’ sereut pus on tite di fime !

Racourti

C’ est ene istwere k’ a-st arivé a Tibirine, e l’ Aldjereye. Des trapisses francès î ont stî stornés.

Po viker et diner åzès djins, les moennes di Tiberene fijhèt crexhe des legumes et des yebes po soladjî les mås, fé del låme, evnd. Onk di zels, li Fré Luk, est docteur et sogne les malådes.

Pitchote a midjote, i s’ ont metou avå les djins do viyaedje ey esse bén veyous dins tot l’ payis,

Çou ki n’ est nén do gosse des estremisses muzulmans, ni co des mwaisses politikes aldjeryins.

Dins on prumî tins, tertos, ossu bén les estremisses ki les politikîs, sayèt do les traker foû do payis. I les mancèt di totes les manires. Zels, il ont peu, bén etindou. Portant, après end aveur bråmint dvizé inte zels, i decidèt do dmorer e leus cassenes.

Ene nute, des djins – on n’ sait nén kî – les ont vnou haper sins doûceur. On les voet co roter lontins el nive dins l’ sipesse brouweur del montagne. Et pu : pus rén !

On n’ ritrouvrè leus coirs tot mesbridjîs ki bén pus tård. Et, a l’ eure d’ enute, mågré les inketes, on n’ sait nén pa kî k’ il ont stî prins…