Calindrî revolucionåre sovietike

Li calindrî revolucionåre sovietike a stî eployî e l' Union Sovietike di 1929 disk' a 1931 (ou disk' a 1940, si on conte l' uzance del samwinne di 6 djoûs).

Djusse après li Revolucion d' Octôbe, Lenine decida di candjî l' calindrî po passer do calindrî djulyin viè l' calindrî grigoryin. Çoula s' fijha li nute do 1î å 13 di fevrî 1918, dj' ô bén tot discontant 12 djoûs.

A pårti do 1î d' octôbe 1929 ene nouve modêye do calindrî a stî strimêye. Dins cisse modêye la tos les moes avént l' minme nombe di djoûs, 30, eyet les 5 ou 6 djoûs ki dmorèt estént stitchîs come djoûs d' condjî, sins k' i fjhexhe pårteye di nou moes et di nole samwinne Ces djoûs estént:

li djoû da Lenine, après li 30 di djanvî
les anêyes bizetes on djoû di rawete après li 30 di fevrî
les djoûs do Travay, deus djoûs après l' 30 d' avri (dj' ô bén k' i toumént å minme moumint ki l' 1î d' may et l' 2 d' may do calindrî grigoryin)
les djoûs d' l' Industreye, deus djoûs après li 7 di nôvimbe

Eto, po lûter conte li samwinne di set djoûs, a foite connotåcion relidjeuse, ci-cile fourit aboleye, eyet replaeceye pa ene samwinne di cénk djoûs. Li djoû di poize n' esteut adon pus l' dimegne, come dins l' uzance crustinne, mins onk des cénk djoûs del samwinne, sorlon l' groupe k' on apårtineut (tos les travayeus estént dispårtis etur cénk groupes di coleur: djaene, rôze, rodje, poûpe, vete); l' idêye esteut ossu d' amidrer l' eficacité di l' industreye e fjhant tourner les oujhenes tos les djoûs, sins ene ahote totes les samwinnes come davance.

Mins mågré ki les djins avént pus di condjîs avou ç' novea sistinme (on djoû so cénk, conte on djoû so set davance) li pårtixhaedje e groupes rindeut li vicåreye e famile et sociåle målåjheye, et cisse samwinne divna foirt impopulaire. Di pus, les wangnes di produjhaedje k' on atindeut avou l' novele samwinne n' ont måy divnou reyålité.

A pårti do 1î d' decimbe 1931 l' ancyin contaedje des moes fourit rmetou en alaedje. Ene samwinne di shijh djoûs a stî adjincêye, avou on djoû di poize e cmon tchaeke 6inme, 12inme, 18inme, 24inme eyet 30inme do moes; li 31 do moes n' esteut nén conté dins l' samwinne eyet il esteut pa côps ou sorlon les plaeces on djoû ovråve ou on djoû d' condjî; pareymint, come i n' aveut pus di 30 di fevrî, a des plaeces k' i gn a on-z a dné condjî l' prumî d' måss, et a ds ôtes on-z aveut do 25 di fevrî disk' å 5 di måss come ovråves djoûs (dj' ô bén, 9 djoûs -- 10 les anêyes bizetes -- en erote).

Mins dins l' pratike li tradicion del poize do dimegne esteut deure a råyî, et sovint les ovrîs prindént ambedeus li dimegne eyet l' novea djoû d'&nsp;poize. Finålmint, e 1940, li viye samwinne di set djoûs a stî rmetowe en alaedje.