Bokets del nute (teyåte)

Bokets del nute (Boquèts dèl nûte), c' est l' live d' ene pîce di teyåte foirt especiåle da Franz Dewandelaer.

Bwès da Walter Van Billingen metou dins l' live, et kécfeye k' a siervou d' decôr po djouwer l' pîce

C' est kécfeye li prumire ouve di Belès letes e walon ki critike li forsipoujhaedje des ovrîs des houyires pa les patrons.

Li pîce a wangnî li Pris di Rwè Albert al bate di scrijhaedje des Relîs Namurwès di 1934. Et çoula, emey cåzu 150 ouves prezintêyes laddlé.

Elle a stî djouwêye pol prumî côp å "Waux-hall" di Nivele li 7 d' octôbe 1934.

Franz Dewandelear fijheut l' cåzeu a solo. Padrî lu, on keur di set djins ki cåzént. I sont pårtis e ceus gropes, ki cåznut tchaeke a s' toû, pu après, tertos eshonne.

Dins l' pîce, gn eto des tchansons (so des cnoxhous airs) et des danses.

Li pîce a eto stî redjårbêye avou l' accint d' Serè pa François Masset ey e l' accint d' Tchålerwè pa Émile Lempereur.

Li live

Li pîce a stî eplaideye e 1935 ås Edicions A. Dandoy å Tcheslet, avou des bwès da Walter Van Bellinghen.

Gn a èn adrovaedje di bén 6 pådjes, e francès, da Émile Lempereur. Adonpwis, l' adviertance do scrijheu kel dit lu-minme (ki c' est ene pîce nén come les ôtes) :

Ça n' est nén ene pîce,

Ça n' est nén ene powezeye,

Ça n' est nén minme on fime,

Bokets del nute,

Yet portant, c' est tot ça.

Dji lai a les cis ki m' liront

El bezogne di classer mes "Bokets del nute" dins les

ouves powetikes

ouves dramatikes

ouves dramatike en èn ake

oubén dins les

ouves a fote å batch

Persounaedjes

Gn a k' on cåzeu tot seu ki c' esteut l' Franz Dewandelaer lu-minme, al creyåcion d' Nivele et on keur di persounadjes. Li cåzeu tot seu est stampé padvant l' sinne.

Les djins do keur, tos omes, sont moussîs e peur. Il ont ene cingue di rodje flanele, ene lådje marone di bleuwe toele. I sont plaecîs e triyingue dissu l' sinne.

Decôr

Li decôr al creyåcion a Nivele, c' esteut èn ovroe dessiné e noer å fond avou troes tchminêye ki foumiént. Li dzo do stoelî esteut rodje; li dzeu, c' esteut l' nute avou ès poûssire d' estoeles. Come sol bwès da Van Billinghen k' est dins l' live al pådje 50.

Hårdêye difoûtrinne

Bokets del pîce (so l' Aberteke).