Belgica (batea)
Belgica c' est l' no di deus bateas di rcweraedje bedjes, li no Belgica c' est l' latén po Beldjike.
Li prumî Belgica
candjîLi prumî Belgica ni s' loméve nén insi å cmince, mins c' esteut on batea norvedjin, constrût e 1884 a Svelvig, eyet lomé Patria (patreye e latén). C' esteut on batea pol tchesse al balinne, avou ene coke di bwès, i pezéve 336 tones eyet mzurer 36m(L) x 7,6m(l) x 4,1m(H).
Adrien de Gerlache l' atchta e 1896 eyet l' arindjî po si espedicion d' l' Antartike. Li batea fourit-st adon rbatijhî Belgica, eyet i naivia viè l' Antartike a pårti d' Anverse li 16 d' awousse 1897.
Ci batea, eyet si ekipaedje, fourit l' prumî a passer l' ivier e l' Antartike; nén k' ça fouxhe la li plan mins l' batea a stî astoké å mitan des glaeces li 28 di fevrî 1897, eyet s' rischaper seulmint 13 moes pus tård, après k' les omes ourixhe schavé on tchenå po leyî passer l' batea. I rariva a Anverse, el Beldjike, li 5 di nôvimbe 1898.
Pus tård li batea fourit-st atchté på Duk d' Orléans ki naivia avou Adrien de Gerlache so sacwantès ôtès espedicions. Li Belgica dimora-st e siervice disk' e 1913.
Li deujhinme Belgica
candjîLi deujhinme batea lomé Belgica est on batea do govienmint bedje eployî, pol govienmint bedje, pa l' Unité di Manaedjaedje des Modeles Matematikes del Mer do Nôr (Management Unit of the North Sea Mathematical Models, MUMM); c' est l' marene royåle bedje ki fornixh l' ekipaedje. Li poirt d' ataetche c' est l' poirt di Zeebrugge, el Flande. Il est redjîstré dizo l' matricule A962.
Li batea a stî comissioné e 1984 pal royinne Fabiola. Ses mezuraedjes sont di 50,90 m(L) x 10,00 m (l) x 5.70 (H). Si tonaedje gros/net redjîstré est di 765t/232t.
Si mwaisse bouye c' est di corwaitî l' evironmint marén del Mer do Nôr, di ramexhner totès sôres di dnêyes so les porcessus biyolodjikes, tchimikes, fizikes, djeyolodjikes eyet idrodinamikes ki s' î fjhèt. Li batea overe come on laboratwere totafwaitmint ahessî, l' analijhaedje des materiås ramexhnés s' fijhant dins des univiersités eyet instituts d' ricweraedje bedjes.
Li batea a-st ossu li consecante bouye di corwaitî après des ôlepesses el Mer do Nôr. Il evoye les dnêyes å MUMM, ki va cårcule li spårdaedje eyet l' impak possibe di l' ôlepesse so l' evironmint.
Difoûtrinne hårdêye
candjî