Drovi l' mwaisse menu

André Berly

André Berly, c' est on fjheu d' tchansons et tchanteu e walon.

C' est purade des tchansons so des muzikes d' årmonica.

Les paroles sont purade a môde di paskeye.

Egzimpe di tchanson da sinneCandjî

Les femes å volant
I.
Les femes k' ont l' permis d' moenner
El divèt ciete a leu beaté.
Dji n' voe nole ôte esplicåcion
K' on lzès låtche el circulåcion.
L' prumî côp k' elle ont leu brevet,
Plaece d' avancî, ele rescoulèt,
Riployant vosse påre-tchoke di dvant.
C' est çoula, les femes å volant.
II.
Dj' a veyou ene a li ståcion
Fé l' plin sins disvistrer l' boutchon
El plaece di rimpli l' rezervwer
Tote li binzene coreut al tere
Elle a tuzé, c' est ewaerant,
Dåbitude, dj' end a po meye francs
Ouy, dj' end a po troes feyes ostant
Dji n' saveu nén k' ele boeveut tant.
III.
Dvant les scoles, do costé d' Bwès-d'-Breu
Dji fjha on sene a ene feme tchåfeu.
Dj' åreu mî fwait di m' tini coe
Ca dji n' conte pus mes senes di croes.
Dji tronnéve télmint les balzins.
Dji lyi djha :"C' est cial ki dji dschin."
Ele mi derit : "Dji vôreu bén
Mins dj' a pierdou m' pedale di frin."
IV.
Al plake ki racsegne on cassi,
Advinez don çou k' ele m' a dit :
"Cette publicité est bien moche
Même pas la marque du soutient-gorge !" [1]
A on bea triyingue reviersé,
Elle a raté l' premiristé [2]
On s' a rtrové - n' a nén d' cwè rire -
Ladzeu, al clinike d' ås Brouwires.
V.
Rawårdez; leye, ele n' aveut rén.
Ele m' a vnou vey li leddimwin
On nozé bouket d' fleur e s' mwin.
Ele mi derit : "Vos n' savoz nén ?
A èn eplwè dvins cisse clinike,
Dji so-st acceptêye, c' est comike.
Vos poloz dire, vs avoz del tchance :
Dji vs va racdure e-n ambulance."
VI.
Dj' a dvou rfuzer l' invitåcion;
Elle end a nén comprins l' råjhon.
Adon, cwand c' est k' dj' a stou rweri,
Dji telefone a on tacsi.
Cwand c' est ki l' vweteure ariva,
Dj' el paya, pu dj' el revoya.
Pocwè, m' diroz vs ? Dji va esse franc :
I n aveut-st ene feme å volant.
VII.
Cwand c' est k' dj' a rintré e m' måjhone
Mi feme m' end aprinda ene bén bone.
"Ene boune novele, mi gros cheri,
Sins vs el dire, dj' a passé m' permis."
Mins k' a dju don fwait å Bon Diu ?
Dji m' måvla tot rodje : "Sacriblu
Si c' est insi, nos dvoirceyrans;
Dji n' vou nén d' ene feme å volant."

Adon, po m' fé pardoner des cmeres, faleut tolminme bén ki dj' metaxhe ene pitite rawete a m' paskeye :

VIII.
N' pinsez nén ki dj' åye ene sacwè
Disconte totes les femes ki moennèt,
Ca dji so bén contin ki l' minne
Mi remoenne cwand c' est k' dj' a-st ene pronne. [3]
Dji ricnoxhe ki c' est bén pratike
Cwand il arive ki dj' a-st ene tchike.
Dji finixhrè m' paskeye tot djhant :
Bravo po les femes å volant.

Sourdants et pî-notesCandjî

  1. E feancès po l' assounance moche / gorge.
  2. Mwaisse modêye "renversé / priorité" (francijhas).
  3. Dins l' accint d' Lidje mëne / prëne.