Hinne (aiwe)

Pol discramiaedje des årtikes avou l' mot « «hinne» et «Hinne» », loukîz cial.

Li Hinne, u Hinne^[1] (e walon coinrece, In.ne^[2] (coinreçmint In.ne u Ène; e francès Haine el Beldjike eyet Hayne el France, e neyerlandès Hene), c' est ene corante aiwe di Beldjike (Walonreye) et d' France, ki s' maxhe e l' Escô a Condé-so-Escô.

Dischindants etimolodjikes

Hinne a dné leu nos å Hinnot (conteye et province) ey ås viyaedjes walons del Botinne (El Bos d' Hinne), Hinne-Sint-Pire (Sint-Piére), Hinne-Sint-På (Sint-Pôl) eyet Veye-so-Hinne (Vile-sur-Ène). Et ås hameas do mimme no a Bådoû ey a Boussu-dlé-Mont.

Coraedje

D' Anderluwe al Marlanwé

Ele prind sourd a Anderluwe. Pu cori so Carniere et trevåtchî Marlanwé.

Sol comene del Lovire

Ele arive a Hinne-Sint-Pire (leyant Hinne-Sint-På sol costé), pu trevåtchî Sint-Vå et Triviere.

Djusse après Triviere ele va vey agoliner ene aiwe ki vént d' Perone, pu l' ri des Estenes. Pu passer a Sterpi, pu a Mårache, pu dlé Bouswa.

Sol Rû ey a Mont

Ele avént adon a Veye-so-Hinne. la k' ele riçût Wanze so s' droete erive.

Après, ele court eviè Havré pu so Ouboû, pu so Nimi divant d' moussî a Mont, la k' ele va esse tchenålijheye, et s' lomer pacô «tchenå do Cinte».

Ele cwite Mont po Djmape, la k' ele riçût l' Trouye so si hintche costé. Pu cori tot droet tot do long d' Otovoye di Walonreye (E42).

Droete lene el Beldjike

Après Mont, so ene droete lene ki londje l' otovoye Brussele-Paris (E19),ele court on moumint so Cargnon, pu passer so Sint-Guilin pu a Hinne (Boussu) sol comene di Boussu k' ele leye a Nonne; pu so Biernissåt, pu so Inzî (Moutroû, Pumrwè, Énin et Tulin) la k' gn a ene escluze (a Debihan), divant d' passer so France.