Li docteur Abdelaziz Al Rantissi (1947-2004) (عبدالعزيز الرنتيسي), fourit on rezistant Palestinî del binde di Gaza eyet onk des askepieus do mouvmint radicå Hamasse.

Vicåreye candjî

I divna l' tchîf do mouvmint e 2004 divant d' esse assaziné på govienmint d' Israyel.

Abdelaziz Al Rantissi vna-st å monde li 23 d' octôbe 1947, e viyaedje di Yebna, metou etur Djafa eyet Ashkelon, asteure pårteye d' Israyel, tins do protectorat britanike el contrêye, dins ene famile di nouv frés eyet deus sours. E 1948, l' askepiaedje di l' Estat d' Israyel oblidje oblidje bråmint d' palestinîs a cwiter leus viyaedjes; c' est insi k' Al Rantissi, adon on påpåd d' shijh moes s' eva avou s' famile pol binde di Gaza, dins l' camp d' refudjîs d' Xhan Younisse.

E 1965, i finixhe ses umanités eyet va studyî l' medcene pediatrike a l' univiersité d' Alegzandreye, e l' Edjipe.

I rvént el binde di Gaza e 1972 eyet cmince a-z ovrer come medcén a l' ospitå Nasser di Xhan Younisse, eyet dvént mimbe di sacwantès soces medicåles del binde di Gaza, come li Soce Medicåle Arabe di Gaza eyet li Societé do Rodje Crexhant Palestinî. Il ovra-st eto come professeu dins l' faculté d' medcene di l' univiersité islamike di Gaza a pårti d' 1978, date d' askepiaedje di l' univiersité. E 1983 Al Rantissi a stî tapé a l' ouxh di l' ospitå Nasser pa l' årmêye d' ocupåcion israyelyinne, pask' i rfuzéve di payi ses tayes a Israyel. Il a stî aresté sacwants côps.

Al Rantissi si maria eyet ourit sdeus valets et cwate båsheles.

E 1987 il askepia, avou ds ôtes mimbes des Frés Moslimîs del binde di Gaza, li Mouvmint del Rezistance Islamike (Hamasse). E 1988 i fourit egayolé po deus ans et dmey cåze di ses activités siconte di l' ocupåcion, eyet co po èn an e 1990.

Li 17 di decimbe 1992 i fourit emey 400 activisses banis pa l' årmêye israyelyinne, eyet tapé d' l' ôte costé del frontire avou l' Liban; cwand i rintra l' årmêye d' ocupåcion l' aresta do côp eyet l' codåna al prijhon disk' a 1997.

On côp rlåtchî, Al Rantissi ridivna onk des moenneus do Hamasse.

I n' fourit nén aresté fok des israyelîs; eto l' Otorité Palestinyinne l' aresta e 1999.

I passa nouv ans e prijhon å totå. e 1997 il a stî dins l' minme celule k' Ahmed Yassin.

Li 10 di djun 2003, i sorvica a ene saye del touwer, la k' l' årmêye israyelyinne evoya des missiles so s' vweteure.

Li 24 di måss 2004, après l' assazinat di Cheixh Yassine, li tchîf do Hamasse el binde di Gaza, Al Rantissi divna l' novea Kimandeu Djenerå do mouvmint, divant d' esse touwé a s' toû li 17 d' avri pa ene atake d' elicoptere israyelyinne ki zingla eto deus ôtès djins.

Li no di s' successeu come tchîf do Hamasse a stî wårdé scret po-z espaitchî k' i n' soeye eto assaziné på govientmint israyelyin.