27 å cwåtron (arimés)

27 au quaut'ron

27 å cwåtron (27 au quaut'ron), c' est on live avou 27 fåves sicrîtes pa Ben Genaux et k' a vudî e 1941.

Il est enimådjî do scrijheu lu-minme avou 30 schaveures lino.

Il a stî eplaidî pa Edgard Piérard a Djilî.

Esplikêyes do tite

On cwåtron d' oûs, c' est 24 oûs d' poye. On è vindeut pus sovint ene dozinne. Et-z è mete onk di rawete. Ça fjheut traze al dozinne. Li ratourneure esteut si rlomêye ki sacwants scrijheus endè fjhît des tites di ramexhnêyes di 13 powimnes u 13 istweres. Come eto Djôr Fayi, rahoukî baltrêyreçmint dins l' divant-z-ouve do live:

Vos pinsez bén nd awè vint-set
Georges Fay, lu, bradèt bén d' ene :
I nd a dné «Traze al dozinne» !
Contez les minnes, si vos l' voloz :
Sins çtele-ci, l' vårén d' fabricant,
end a metou k' vinte-shijh…

Contnou

Li live (sins limero d' pådje) kimince pa èn adrovaedje foirt simpe:

Gn a pont
(on n' les lét djamåy)

Vizon vizu, gn a èn otoportrait do scrijheu.

On passe al prumire fåve.

A gåtche, po tchaeke fåve, gnè va aveur on dessén do scrijheu.

Avou ça ki tchaeke fåve finit pa ene morålté, a môde di pinsêye.

Kékes egzimpes

Voci li dvant-prumî boket, sins tite

On fwait deus viers d' on côp d' eschoupe.
Morålté:
Li mitan d' onk, c' est pacô dobe.
(A tos les cis k' ont peu
k' leu feme èn fouxhe côpêye e deus på tram)

Eyet vci l' dierin, ki s' lome:

Istwere di molons

Istwere sins fén

El fén d' l' istwere

El djonne govion aveut bén rî
cwand ç' molon la, sol fond do ri
tot bounasmint, s' aveut fwait prinde !
Mins l' molon n' ît nén co dins s' vinte
ki, lu, l' govion, esteut broké
come ene fritche, dins l' cene d' on brotchet !
« Ça comince bén ! Å toû d' èn ôte !
dit-st i l' pus gros. Ç' n' est nén des prôtes,
èç gouvion ci m' a shonné bon !…»
Dins l' ci k' a shû, gn aveut èn amçon…
«Bén… Dji vou bén atraper l' tegne,
dit-st i l' pexheu e rsaetchant s' lene
si dj' a rlevé, dispu troes ans
on pexhon k' esteut si pezant ! »
Å niût, on l' a metou dins l' paile
ey il a yeu tchôd ses scoirdeles.
Seulmint, ça-z a bén må tourné
paski l' pexheu vos eforneut
si bén rade et roed ses boutchêyes
k' il a stronné pa s' golafreye !…
Ès feme a brai on djoû ou deus,
ey on-z a eteré l' pexheu :
c' est des molons del cimintire,
des ptits, k' ont rachevé l' istwere…
Morålté:
Po fini, vs veyoz bén, endon
ki c' est l' pitit ki mindje li gros !