Veye do Bwès (Li Viye Såm)

Li Veye do Bwès, c' est on hamtea del Viye Såm, ki sereut li prumî viyaedje do payis d' Såm, metou so on croupet. Li voye ki va del Veye do Bwès al Viye Såm esteut ddja cnoxhowe cwand les Contes di Såm ont-st arivé, diviè 1100.

L' eglijhe n' a stî basteye k' å cminçmint do 20inme sieke.

Sipotaedje des djins: les Cawets.

Såm vinant do Ptit-Tier, toûne åtoû del Veye do Bwès divant d' ariver al Viye Såm. Li voye di tchmin d' fier ki les Almands avént fwait tins del guere di 1914-1918 po-z aler del Viye Såm a Sint-Vit n' a sepou passer li croupet del Veye do Bwès, et diveur fé l' toû, a pô près come l' aiwe. Ci tchmin d' fier la a roté disk' al guere di 1940-1945, la k' on-z aveut fwait potchî li Grand Pont inte li Veye do Bwès et l' Viye Såm.