Vias d'mârs´

Vea d' måss (Vias d'mârs´), c' est ene ramexhnêye d' arimés e walon da Émile Gilliard k' a vudî come limero especiå des Cayés walons, e nôvimbe 1961 ( 9). I gn a vint-ût powinmes dins l' ramexhnêye, ey on motî d' ene pådje al difén.

Corwaitaedje candjî

Dins les prumîs powinmes del ramexhnêye, Gilliard critike bråmint les ritches, paski, sorlon lyi, i fwaiynut nén leu pårt del bezogne. I dit k' les « pezants cous » n' fwaiynut nén bon manaedje avou l' sonkenaiwe.[1] Por lyi, c' est l' peupe k' a tot fwait po les ritches, et ç' n' est nén djusse ; i s' met daleure lyi-minme emey li peupe : « tos leûs bias djoûs on l's-a stanç'né avou dès bwagnes èt dès chalés »[2]

Dins sacwants powinmes, c' est come si les ritches serént des biesses et pus des omes :

s'on p' lèt 'rwaitî paus-è fignèsses
c'èst pîre qui dès rats dins leûs traus
is sont-st-achîs dins leûs-ayèsses
come dès molons dins l'tchau[3]

I gn a minme on pô d' violince dins sacwants bokets :

l'âréve falu r'satchî lès fourûres
di leû feume èt l' tchapia-bûse
dès p'tits monsieûs trop bén r'plin.nis
quéntfîy qu'on-z-âréve ritrouvé dès-omes[4]

Pol resse, c' est foiravant ene peneuse ramexhnêye : Gilliard î cåze do froed, del pôvurté, del moirt, do cimintire… Il a l' idêye k' tot va todi pus må : « tot toûne à broûs què vous-se qu'on faiye d'ôte qui d' tûser à tot ç' qu'on pièd »[5] I gn a k' dins ene pougnêye d' powinmes ki cåznut d' frecanter ene djonne comere k' il est ene miete pus optimisse.

Sourdants candjî

  1. Émile Gilliard, Vias d'mârs´ (Cayés walons, nôvimbe 1961,  9), p. 159.
  2. Minme sourdant, p. 150.
  3. Minme sourdant, p. 153.
  4. Minme sourdant, p. 149. Vaici eto, i gn a l' idêye ki les ritches ni sont pus des vraiyès djins.
  5. Minme sourdant, p. 160.