Todi Walons (tchanson)

Todi Walons (Todis Wallons), c' est ene tchanson e walon sicrîte pa Guillaume Bodet e 1898, eyet rcoridjeye pa Nicolas Pietkin, k' est loukî come cowoteur.

Li muzike, c' est on timbe lomé «Les adieux de Bertrand» (ki c' est l' minme pîtaedje ki l' ime des Lussimbordjwès).

Istwere

Li tecse s' a diswalpé sol divize do Club walon d' Måmdiy, «Todi Walons», ki va divni li dvize oficire del Walonreye.

Å prumî tchantaedje å mwaisse raploû do Club e moes d' setimbe 1898, gn ava do forbataedje sol hagnon ki dit l' fidelté a l' impreur del Prûsse. Ci hagnon la serè rsaetchî di l' edicion do tchant dins l' Lire måmdiyinne di 1966.

Tecse del tchanson

so Wikisourd: Nosse tchant nâcionâl (modêye Feller del «Lire måmdiyinne»).

Corwaitaedje do walon

Les deus dierinnès strofes sont foirt rifrancijheyes, çou ki s' comprind, come les Måmdiyins k' avént stî a scole et ki håbitént les otorités djåzént aprume l' almand. Por zels, li francès et l' walon, c' esteut cåzu Piron parey, aprume dins l' lingadje di belès-letes.

Les deus prumires, ça va, mins dandjreus ki c' est zeles k' ont stî bråmint ramidreyes pa Nicolas Pietkin. Mins des puriveus, come les soces di scrijheus d' après Nameur e 21inme sieke, årént seurmint fwait rmarker ki :

• «langue» si pôreut dire pus walonmint «lingaedje».
• «durant doze siekes» si ratoûne pus voltî «doze siekes å long»
• «ancete» est puvite dit «tåye» u «tayon»