Scrijha qu

Li scrijha qu, c' est on scrijha do walon ezès sacwants vîs sistinmes ey e sistinme Feller (purade après Nameur et Tchålerwè), po rinde li son K po des mots d' etimolodjeye latene (ki si scriynut avou "qu" e francès).

Li scrijha «qu» n' a nén stî rprins e rfondou walon, di cåze del rîle otomatike do scrijhaedje do son K.

Pol shuvion «kw», les minmes eployeus scrijhèt «qw», mins pacô eto «quw»

uzaedje do scrijha qu dins les motîs walons e sistinme Feller

Li sistinme Feller lait l' tchuze inte on scrijha etimolodjike (qu po ces mots la) et on sistinme fonetike (K eployåve totavå).

Les motîs do walon do Mitan et do walon do Coûtchant prindèt todi «qu».

Li grand motî del Basse Årdene, li motî d' Bastogne n' eploye måy li scrijha «qu». Parey pol båze di dnêye di l' Årdene nonnrece. Sacwants ôtes motîs ont shuvou (S40). Mins l' motî Twisselman di Bouyon scrît voltî des «qu», pår po des mots la k' on n' l' atind nén.

Lidje halkene sovint, mins c' est cwand minme «qu» li pus préjhî. So Måmdey, li scrijha «k» est veyou evi. On a des «qu» minme po "ki" (quu).