Robert Stainier

Pol discramiaedje des årtikes avou l' mot « Stainier (no d' famile) », loukîz cial.

Robert Stainier, c' esteut on scrijheu e walon, k' aveut skepyî a Tcheslet e 1918. Il a morou e 2005.

Il est relî dins l' Antolodjeye Scrire.

Di s' mestî, il esteut ovrî dins l' metalurdjeye.

Vicåreye

Il a lontins dmoré a Couyet.

Ouve e walon

I n' sicrijha k' des arimés, inte di zels, des cis po ls efants.

Ses scrijhaedjes estént eplaidîs dins l' Bourdon.

Onk di ses powinmes

Dj' é mau

Dj' é mau dins lès pârtchès di m' vikâdje cafougni
pauzès vints d' toute lès cougnes, pauzès rapitach'rîyes.
Çu qu' asteut vèrdèlè s' a mètu a djâni,
èyèt lès platès vôyes sont tèrtoutes trifouyîyes.

Dj' é mau dins lès souv'nances coumèléyes pau toûrmint
dès djoûs trop mau spaurdus come dins-in rafous'nâdje
pa 'ne saquî d' malasnè doubén pa l' ér' du timps,
grigneûs come d' abutude, mèch'nè in djoû d' orâdje.

Dj' é mau dins tous mès-ans clatchis padrî lès- uchs.
Dj' é mau pasqu' is sont woute, qu' is-ont blanki mès tch'vias.
Dj' é mau pasqui l' bouneûr a djouwè a calmuche
èt qui lès djès a v'nu n' anonç'nut né du bia.

Dj' é mau, dj' é co pus mau, p'tète al longue d' awè mau.
Et fôra soufru ça djusqu' au djoû dèl dèréne
quand l' fautcheû s' amwin'ra, doûç'mint, a pîds discaus
pou rôyî l' sicorîye qui f'yeut toûrnér m' toûrpène.