Powezeyes do docteur Vermer

Powezeyes do docteur Vermer, ki l' tite e francès, c' est Poésies du Docteur Vermer, c' est ene ramexhnêye d' arimés sicrîts pa Augustin Vermer, et k' a vudî a Nameur e 1905. Li live a stî replaidîs dins on cayé walon e 1967 (l° 2).

Egzimpe d' arimé

Li Wachotadje

Modêye riscrîte en ortografeye Feller, a môde des Relîs namurwès.

Quand on médecin ôrdone on r'méde aus payisants,

I dut l'zî èspliquè lès pondants, lès djondants,

S'i faut cûre lès ièrbéyes, comint qu'i faut qu' ça s' faîye,

S'on dut bwâre totes lès-eûres on couyî do l' botèye,

S'on prind lès pilûres divant d'awè mougni,

Èt surtout bin l'zî dîre qu'i n' faut nin lès massyi.

Ôtrèmint, i n' vos f'ront qui totes sôrtes di lwagnerîyes

Po s' mète brâmint pus mau ou min.me po piède li vîye.

Insi quand l' médecin cause di lavemint au laton,

10 S'i n'a nin sogne d'avance do dîre di quèle façon

Qu'i faut mète l'aîwe dissu po qui l' bruwèt si faîye,

I gn-a dès cias qu' mètront li laton dins l'ostèye.

Ôrdonez dès poussètes : quéquefîye i vos demanderont

S'i faut qu'on lès faîye fonde, ou lès prinde come èle sont.

Gn-a co dès-ôtes, pus bièsses, en r'ciyant dès pilûres

Qui s'infôrmeront comint qu'i faut qu'on lès faîye cûre.

On djoû, on gros loûrdaud vint consultè l' médecin

Po s' pére qui languichèt dèdja dispû longtimps.

Li docteûr è lî dit : " Dimwin, djè l'îrè vèy

Maîs tot-en ratindant, v' lî r'pwatroz one botèye

Èt vos n' rovîyeroz nin qu'i faut bin l' wachotè

Totes lès-eûres au momint qu' vos sèroz po 'nn'î d'nè."

Noste ome apougne li drogue èt rarive au viladje :

Papa, di-st-i à s' pére, dji v' rapwate on bruvadje

Qui va vo fè do bin ; maîs on-z-a ric'mandè

Qui, chaque côp d'vant do l' prinde, falèt vos wachotè;

Insi lèyoz-vos fè èt purdoz bon coradje."

" Vunoz, di-st-i à s' frére, mètans-nos à l'ovradje. "

" - Malèreûs, rèspond l' pére, vos m'aloz fè mori. "

" - Non.na, papa, non.na, pusqui l' médecin l'a dit.

Vos savoz bin come nos qu'il a dès conuchances

Èt qu'i faut sins r'nictè sîre totes sès-ôrdonances.

Poqwè prinde si-t-avis, s'on nè l' vut nin choûtè ?

Po n' nin fè ç' qu'i comande, i n' faut nin l' consultè. "

Qu'aurèt-i seû rèsponde à one sifaîte morale ?

Nos deûs-omes l'apougnèt pa lès pîds, pa lès spales,

Wiche-wache, wiche-wache, wiche-wache, quand il èst wachotè,

On lî wîde on couyî, on lî faît avalè.

Sitôt qu' l'eûre èst finîye, on rac'mince li min.me danse

Sins waîti s'i n' p'lèt mau do pèri dins s' soufrance.

Li trwèzin.me côp portant, i n' criyèt pus si fwârt

On vut lî d'nè l' couyî on vèt qu'il astèt mwârt

Li lend'mwin, li médecin vint po lî fè s' visite ;

Vèyant qu' tot l' monde brèyèt, i s'infôrme au pus vite

Si l' malade va pus mau, ci qu'i gn-a d'arivè :

" Ô, dit nosse gros loûrdaud, ça n'a pont faît d'èfèt.

Nosse pére a trèpassè au trwèzin.me wachotadje,

I sintèt bin, l' pôvre ome, qui maugré tot s' coradje,

I n' saurèt supwartè d'èsse kitapè come ça,

Ca il a bin criyi : lèyoz-m' la, lèyoz-m' la. "

Po n' pus jamaîs awè one aventure parèye,

Li médecin dit asteûre : Vos wachoteroz l' botèye.