Pitits mots do dimegne å matén (tecses)

Petits mots du dimanche matin

Pitits mots do dimegne å matén ki l' tite est e francès (Petits mots du dimanche matin), c' est ene ramexhnêye i tecses ki Émile Hesbois aveut scrît davance (etur li 17 di may 2015, eyet l’ 21 di djulete 2023) so les rantoeles di soçnaedje.

Li live a rexhou e 2023 ås Edicions do Cerijhî a Cwême.

Les ratournaedjes e francès sont vizon vizu, mins l' walon est metou sol pådje di pawene.

Contnou

Divanzouve : li scrijheu esplike si cårire di teyåtreu. Il î acertene ki totes les imådjes k’ i meteut dins ses tecses e francès vinént do walon.

Gn a bråmint des tecses powetikes, mins purade a môde di prôze-powezeye u di libe powezeye.

Pacô, c' est des sovnances. Manif des overreces di Hesta po-z awè les minmes salåres ki les omes. Sovnances do djoû del liberåcion e 1944 (k' il aveut 7 ans).

Gn a troes tecses k' avént stî metou e muzike des Crapådes.

Lingaedje walon

Li walon nos amoenne des bounès sorprijhes avou des mots et des ratourneures ki n' sont nén dins les belès-letes ni dins les motîs walons. Ca li scrijheu rashît s' walon so ses sovnances, nén so des lijhaedjes ou des studiaedjes.

On sait vey si fene kinoxhance do walon dins cisse pî-note ci:

« stitchî », c’ est on doûs mot ; « tchôkî », c’ est pus vif . Cwand m’ mame m’ a vlou aprinde li vicaedje : « Avou les comeres, i fåt prinde li tins divant di stitchî l’ broke dins l’ tchabote. » (p. 86).

Come li sicrijheu n' a nén stî dins des soces u des scoles di walon, i n' s' a nén dispårti del croejhete francesse (metans po l' acoird des pårticipes erireces).

Gn a eto des mots nén bén rtapés pa l' eplaideu.

Alére

Dins Li Rantoele 108, ivier 2023-2024.

• Conte-rindou do live (p. 14)
• Palestene, mi binamêye (powinme so l' intifada, p. 12)