Micoplasse

On micoplasse (dinltins on djheut eto on PPLO, po Pleuro-Pneumoniae-Like-Organism), c' est on mo ptit microbe, sins paroeze, ki s' sait mopliyî tot seu, come les ôtès bactereyes mins ki pout eto moussî dins ene celule do coir (come les virûsses).

Les micoplasses ni mzurèt ki 200 a 500 nanometes, et, come il ont ene cogne ki candje tofer (poy k' i n' ont nole måjhire), on n' les såreut ddja vey å microscope optike.

Les micoplasses ont stî discovris e 1898 pa Nocard et Roux.

Les micoplasses cåzèt des maladeyes azès djins et azès biesses, k' on lome des micoplasmôzes. Il ont ptchî di s' aler edjîstrer dins l' peumon, les djonteures et l' aparey djenitå. C' est po ça ki les micoplasses des poyes polèt passer del covresse eviè les poyons.

Les micoplasses polèt sorviker di 5 a 7 djoûs dins d' l' aiwe di pousse (conte, metans 14 djoûs po Pasteurella multocida).

Imunolodjicmint, les micoplasses polèt candjî raddimint les proteyenes di leu paroese; eto, i divnèt rade nén ricnoxhåves pa les anti-coirs.

Deus maladeyes ås micoplasses sont sol djivêye des cenes ki dvèt esse diclarêyes a l' O.I.E., c' est les micoplasmôzes a Mycoplasma galisepticum et Mycoplasma meleagridis. Ambedeus sont rprinjhes dins les directives uropeyinnes po les discandjes di poyes et poyons.

Les micoplasses polèt esse acsûs pa sacwants antibiyotikes, come les macrolides, les tetraciclenes u les kinolones. Come di djusse, les antibiyotikes ki hiyèt li paroese des bactereyes, come les penicilenes, ni sievront a rén, poy ki les micolasses n' ont nole måjhire.

Sacwants micoplasses

• Mycoplasma pneumoniae (pleuro-peumoneye des djins)
• Mycoplasma bovis (pleuro-peumoneye des vatches)
• Mycoplasma galisepticum (maladeye respiratwere pardurante des poyes)
• Mycoplasma synoviae (djonturite des poyes)
• Mycoplasma meleagridis (micoplasmôze des poyes d' Inne)