Li blanke leuve (live d' imådjes)
« Li blanke leuve », c' est on live d' imådjes e walon k' a stî scrît pa Jean-Marie Warnier.
Il est enimådjî pa Pauline Claude.
Kimince do live
candjî- Li nute n’ est nén co toumêye. Portant, dedja, on n’ voet cåzu pus les betchetes des faws ki schovèt l’ cir, et l’ nivaye n’ est pus blanke, mins d’ on bleu d’ åcolete [ancolie] come li roye do cir [horizon] après l’ oraedje.
- L’ efant rote e grand bwès. Låvå, a Boumål, i doet fé tchôd al coulêye di l’ aisse. C’ est l’ eure di soper. « Mi mame si doet tourminter ». Li nute n’ est nén co toumêye. Portant, dedja, on cmince a esprinde les fniesses, ki lujhèt el noeristé come les moxhes di Sint-Djhan (lucioles), come des ouys di tchet.
- I n’ a ki l’ måjhone do notåre ki va dmani aveule.
- Li ci k’ î vôreut intrer, li båbou l’ epoitreut, la k’ i n a des sapéns totåtoû, et k’ on nel voet waire del voye cwand c’ est k’ on nel lome [éclaire] nén.
- C’ est ene måjhone k’ a todi fwait sogne, pår asteure k’ el notåre est evoye, et Lorince avou. « Mi, djel loméve todi Pervintche ».
- Li gamén k’ est la ki rote el nive, i dvreut cmincî a-z aveur sogne, ca c’ est l’ eure ki l’ ariole des biesses di nute atake e grand bwès. Portant, l’ efant rote. « Dji vs ritrouvrè. Li blanke leuve mi dirè çou k’ dji doe fé. Et ele mi dinrè des pieles et des colés por vos, Pervintche. I n’ a k’ a trover l’ blanke leuve. »
- I n a bén lontins d’ cial vikéve e tchestea d’ Boumål ene djonne princesse k’ avizéve ene andje avou ses longs tchveas si télmint blonds. Dj’ ô bén k’ elle esteut l’ pus bele di totes les djonnès feyes d’ avår la. Li pus ritche ossu, ca s’ popa esteut-st on grand signeur.
- Leye k’ åreut polou maryî on conte, on duk, on prince, pocwè a-t i falou k’ ele veyaxhe voltî on pôve pitit djouweu d’ vierlete ? Li muzicyin n’ åreut måy oizou taper ses ouys si hôt. Adon, i l’ a rbouté.
- Ele l’ a veyou nd aler so Werisse, la k’ gripéve li Mont Pelé. Ele l’ a volou shure. Leye ki n’ aveut måy cwité l’ tchestea, k’ aconcoistêye di gåres s’ a metou a roter tote seule e grand bwès, trovant s’ voye d’ après l’ vierlete. Elle esteut si nantêye k’ ele s’ aresta po s’ rihaper ene miete al Pire Heyna. Et la, ele s’ edoirma.